«Удмурт Кенешлы» выль Тӧро бырйизы
7-тӥ толсуре азьветлӥсь удмуртъёс люкаськизы Ижкарысь Калыкъёслэн эшъяськон юртазы. Татын Вань удмуртъёслэн XV (азьвыл чакламтэ) ӧтчамзы ортче. Ужрадэ Удмурт Элькунысь, Башкортостанысь, Татарстанысь, Марий Элысь, Пермь шаерысь, Киров улосысь, Санкт-Петербургысь 215 делегатъёс вуизы. Озьы ик ӧтчамлэн ужаз пыриськизы Правительстволэн Тӧроез Ярослав Семенов, министръёс но депутатъёс.
Ӧтчамлэсь пленарной кенешсэ котьку сямен «Удмурт Кенешлэн» гимнэныз усьтӥзы. Собере делегатъёс сӥё-дано ужез быдэстӥзы: кенешчиослэн ӟеч сямлы пӧрмемын ини котькуд ӧтчамзэс кутскыны Удмурт кунлыкез кылдытӥсьёсты, удмурт калыклэсь дано пиоссэ — Трокай Борисовез, Иосиф Наговицынэз но Кузебай Гердэз — буре вайыса, синпелетъёссы доры сяська поныны.
«Удмурт Кенешлэн» Тӧроез Татьяна Ишматова огазеяськемлэн берло 2 аръёсы ужамезлы йылпумъянъёс лэсьтӥз. Докладаз со пусйиз, асьме удмурт кылмылэн нимысьтыз инлыкез вань. Котькуд ёросын пӧртэм ужрадъёс ортчытъясько, бадӟым уж нуиське йӧскалык дышетонын. Но удмурт кылэз дышетон ужпумез нылпи садъёс но школаос вылэ гинэ куштыны уг яра. Мукет ӧръёсысь но ӧнерчиосты, азьветлӥсьёсты кысконо. Огазе кариськыса ужано шуиз со.
Озьы ик докладэн вераськизы «Удмурт Кенеш» огазеяськемлэн Балезино ёросысь ёзэзлэн кивалтӥсез Надежда Наговицына, Татарстанысь удмуртъёслэн лулчеберетъя йӧскалык автономизылэн кивалтӥсез Андрей Герасимов, «Удмурт Кенеш» огазеяськемлэн Вавож ёросысь ёзэзлэн кивалтӥсез Ирина Ложкина но Вотка карысь 44-тӥ номеро нылпи садлэн кивалтӥсез Валентина Вахрушева. Соос веразы, кызьы асьсэ доразы удмуртлыкез азинто, кыӵе амалъёсты ужазы куто, озьы ик тодматӥзы тужгес усто ӵектосъёсынызы.
Ӧтчам улсын мыло-кыдо кенешчиос пӧртэм данъетъёсын пусъемын вал. Трокай Борисов нимо йӧскалык премилэсь лауреатсэ данъязы. 2022-тӥ ар понна сӥё-дано нимез басьтӥз Александр Аркадьевич Прохоров, Шаркан ёрослэн азьвыл йырыз, гурт удысъя но сиён-юонъя азьвыл министр. «Удмурт Кенешлэн» Данъян книгаяз но выль нимъёсты пыртӥзы. Со: Алевтина Перевощикова — «Удмурт Кенеш» огазеяськонлэн Вотка ёросысь ёзэныз кивалтӥсь, Александр Аблаев — Грак ёрос муниципал кылдытэтлэн йырызлэн воштӥсез, «Удмурт Кенеш» огазеяськонлэн ёросысь ёзэныз кивалтӥсь, Валентина Комиссарова — «Удмурт Кенеш» огазеяськонлэн Ува ёросысь ёзэныз кивалтӥсь, «Купанча» калык ансамблен кивалтӥсь, кырӟась, удмуртлыкез утись но ӝутӥсь, Надежда Касаткина — Эгра ёросысь Эшъяськон юртысь суредась-модельер, «Питыран» нимо модая театрлэн директорез, Андрей Герасимов — Татарстанысь удмуртъёслэн национально-культурной автономиенызы кивалтӥсь.
Нош Тӧрозы воштӥськоз шуыса кенешчиос азьвылгес тодо ни вал, уго Татьяна Ишматова Пичи кенеш азьын куриз вал ассэ «Удмурт Кенеш» кивалтонлэсь мозмытыны. Ас интыяз со ӵектӥз Кун Кенешысь Культурая, туризмъя но нациосын ужан политикая ялан ужась ӧрилэсь кивалтӥсьсэ Андрей Ураськинэз. Куара сётон шара радъяськиз. Оглом калык Андрей Иванович понна дурбасьтӥз.
Быръёнъёс бере уж азинскиз секциосын: «Удмурт Кенеш», «Удмурт нылкышно кенеш», «Шунды» но бускель улосъёсын улӥсь удмуртъёс асьсэ сюлмаськонъёссы сярысь кенешизы.
