«Удмурт кенешлэн» Пичи Пурга ёросысь ёзэтэныз кивалтӥсе Надежда Степанова быръемын

Ёросысь удмурт азьветлӥсьёс йылпумъянъёс лэсьтонъя но быръёнъёсъя конференци ортчытӥзы. Пумиськон радъяськиз Баграш-Бигра гуртысь культура юртын.

«Лыктэм адямиослы ортчытӥзы «Даур шыкыс» музейын экскурсия. Туристско-информационный центрын ужасьёс вань мылкыд карисьёслы веразы но тодматӥзы ёросмылэн туристической картаеныз. Удмуртлыкез утёнъя удысын ужасьёс — ёрос кивалтӥсьёс, дышетӥсьёс, лыдӟиськон юртын ужасьёс веразы ужан мылкыдъёссэс, вормонъёссэс но сюлэмшугъяськемзэс» — ивортэмын Пичи Пурга ёрос администрацилэн вотэсбамаз.

Тодады вайтом, «Удмурт кенеш» огазеяськонлэн Пичи Пурга ёросысь ёзэтэныз та дырозь кивалтӥз Василий Москвин. Надежда Степанова нош «Удмурт нылкышно кенеш» лэн тӧроез луыса кема аръёс ӵоже тыршиз.