“Удмурт Кенешлэн” исполкомезлэн видеоконференци амалэн кенешонэз ортчиз

Татьяна Ишматова за рабочим столом

Ужрадэ огазеяськонлэн каръёсысь но ёросъёсысь ёзэтъёсызлэн кивалтӥсьёссы пыриськизы.

“Удмурт Кенеш” огазеяськонлэн Тӧроез Татьяна Ишматова:

Мон ваньдылы капчи мылкыд сӥзисько, сыӵе секыт вакыт ке но, куке ог-огмес адӟыны быгатӥськом экран пыр гинэ, телефон пыр гинэ вераськиськом, но соин валче туж сыӵе валтӥсь ужпумъёсмы вань, кудъёссэ ӵош кенешыны кулэ“.

Инвожо толэзе “Гербер” шулдыръяськон ортчыны кулэ вал. Жаляса верано, коронавирусэн йырин, малпам ужрад воштӥськиз. Соин ик Йӧскалык политикая министерство вазиськонэн потӥз гудырикошконэ “Выль” праздник ортчытоно шуыса. Ужрадэ ӧтьыны ӵекто мукет калыкъёсты но. Кенешчиос мылкыдзэс веразы праздникын мукет калыкъёс понна площадкаос ужазы ке но, шулдыръяськон удмурт шӧмо кыльыны кулэ, калыккуспо фестивальлы пӧрмыны кулэ ӧвӧл шуыса. “Выль” – со удмурт вашкала праздник. Соин ик шулдыръяськон удмурт лулчеберетэн, удмурт йылолъёсын герӟаськемын кулэ луыны.

“Айкай” театрлэн кивалтӥсез Пётр Данилов:

Элькун шулдыръяськон Удмуртилэн кунлыкезлы 100 ар тырмонэз пусъён улсын ортчоз, соин нокинэ но палэнэ кельтыны уг яра. Но удмуртлыкез отын яркытгес возьматыны быгатыны кулэ“.

Исполкомчиос но кенешчиос мукет ивортонъёс сярысь но вераськизы. Туннэ нуналлы тодмо луиз Финн-угор калыкъёслэн дунневыл конгрессы вуоно 2021-тӥ арын гинэ радъяськоз на шуыса. Туэ со инвожо толэзе Эстониын ортчыны кулэ вал. Конгресслэн воштӥськонъёсыз ӧвӧл. Темаез но, программаез но озьы ик кельтэмын. Ужрад озьы ик Эстониын радъяськоз.

Куартолэзе ортчыны кулэ вал удмурт нылкышноослэн бадӟым ужрадзы но. Со “Удмурт нылкышно кенеш” огазеяськонлэн отчетно-выборной конференциез но удмурт нылкышноослэн нырысетӥ ӧтчамзы дырысен 100 тырмонлы сӥзем конференция. Ужрад ортчытыны чакламын 24 куарусёнэ.

Калыкез сюлмаськытэ удмурт радиолэн, телевиденилэн ужамез но. Гужеме потӥськом бере, солы тросгес саклык висъяське. Кызьы ужалоз та дыре телерадиокомпанимы, кыӵе выль передачаос потозы, кыӵе луоз вещаниез. “Мынам Удмуртие” телерадиокомпаниысь валтӥсь редакторезлэн воштӥсез Сергей Касаткин:

Али зэм но туж кысык вакыт, малы ке шуоно элькунамы потаны сюрес ворсаськемын. Куное но али дыре нокинэ ум ӧтчаське. Соин ик тани таӵе амалэн, видеоконференция пыр гуртын тыршисьёсын вераськиськом. Соин ик, кинлэн иворъёсыз вань, скайп пыр, яке телефон пыр видеоостэс келяны быгатӥськоды, нош ми соосыз эфире поттом. Оскиськом, инвожоысен куноосмы луозы ини, авторской программаос берытскозы

Кенешонлэн пумаз люкаськемъёс буре ваизы улонысь кошкем адямиосты. История наукаосъя докторез, Удмурт Элькунысь наука удысысь дано ужасез Маргарита Григорьевна Ивановаез но тодмо политикез, сенаторез, «Справедливая Россия» партилэн Удмуртиысь ёзэныз азьвыл кивалтӥсез Виктор Евграфович Шудеговез.

ивор басьтэмын “Удмурт кенеш” огазеяськонлэн вотэсбамысьтыз

Контентмейкер, мемолог и журналист

Дом Дружбы народов
Добавить комментарий