«Удмурт Кенешлэн» исполкомез люкаськылӥз

Ужрадэз кутскыса огазеяськонлэн Тӧроез Татьяна Ишматова люкаськемъёслы Ижкар Герберез радъяны юрттӥськемзы понна тау кариз, шулдыръяськон ортчем пумысен мылкыдзэ шараяз: «Герберлы котьку кема дасяськом, соин ик солы туж трос дырез висъяно луэ. Тау карисько ваньдылы, кин мыло-кыдо пыриськиз бадӟым ужрадэз ортчытонэ. Туэ туж паськыт ортчиз удмуртъёслэн кар шулдыръяськонзы. Ваньмыз ӟеч радъямын вал. Асьмелэн площадкамы но туж умой ужаз. Шумпотымон, арганчиослы сӥзем вожвылъяськонэ пыриськисьёс трос люкаськизы».

Татьяна Витальевна озьы ик пусйиз али элькун Герберлы дасяськон ужъёс йылаз-пумаз вуо шуыса. Люкаськемъёс праздниклэсь радлыксэ учкизы, делегациосын списокъёсты дасязы. Тодады вайытом, удмуртъёслэн валтӥсь шулдыръяськонзы 29-тӥ инвожое Эгра ёросын ортчоз. Ӵапак со Татарстанысь удмуртъёслэн Гырон-быдтон праздникенызы одӥг нуналэ тупа.

Исполкомлэн ёзчиосыз мукет матэктӥсь ужрадъёс сярысь но трос вераськизы. Удмурт егитъёслэн «Шунды» огазеяськонзылэн кивалтӥсез тодматӥз «Шундыкар» но «Усточикар» лагерной сменаосын. Дышем сямъя ни, соос гудырикошконэ ортчозы. Туэ «Шундыкарын» выль направление луоз. Пиналъёс удмурт контент бордын ужаны дышетскозы. Алина Черновалэн верамезъя, лагерьёсы куриськонъёсты кутон йылпумъяське ини. Конкурс пыр потэмъёс 1-тӥ пӧсьтолэзе шараямын луозы.

Со сяна шундыос мылкыд карись командаосты быдэ вуонлы сӥзем «Эру» празднике витё. Нош Можгаысь кенешчиос выль емышлы сӥзем «Выль» элькун празднике ӧтчасько.

«Праздник 3-тӥ гудырикошконэ «Свет» профилокторий палан ортчоз. Шулдыръяськон интыын Выльгурт кылдоз. Отын Йӧл, Нянь, Чорыг, Чечы но мукет урамъёс луозы. Котькудаз сиён-юонъёсын вузкарон ортчоз. Озьы ик пӧртэм площадкаос ужалозы, вуэм коллективъёс концерт возьматозы», – вераз «Удмурт Кенеш» огазеськонлэн Можга ёросысь ёзэтэзлэн кивалтӥсез Эдуард Петров.

Эскороно ужпумъёс пӧлын ӵектэмын вал кар но ёрос кенешъёслэн кивалтӥсьёсынызы гудырикошконэ семинар ортчытон, куарусён толэзе Сарапулын удмуртъёслэн ӧтчамзы дырысен 100 тырмонлы сӥзем ужрадэз радъян.

Тужгес но бадӟымез туннэ вераськон мынӥз «Удмурт Элькунлэн Дано кунмуртэз» ним басьтонъя кандидатъёс пумысен. Ува ёросысь депутатъёс дэмлало Удмуртиысь калык крезьгурчиез – Пантелей Кузнецовез, нош Суредаськисьёслэн огазеяськонзы – Удмуртиысь калык суредаськисез – Семён Виноградовез. «Удмурт Кенеш» огазеяськонлэн ёзчиосыз одӥг кылысь кадь кыксы ик ӵектэм дано муртъёс понна дурбасьтӥзы. Витьыны кылиз комиссиялэсь кылкутонзэ.

https://vk.com/udmurtkenesh

 

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий