«Удмурт Кенешлэн» Данъян книгаез выль нимъёсын узырмиз

Удмуртлык понна вань сюлэмынызы висись, калык понна трос лэсьтэм адямиосты, азинлыко тыршисьёсты «Удмурт Кенеш» огазеяськон арлы быдэс пыртэ аслаз Данъян книгаяз. Туэ вить адямиез сӥлы каризы.

Алевтина Перевощикова — «Удмурт Кенеш» огазеяськонлэн Вотка ёросысь ёзэныз кивалтӥсь. Со сюлмаськемен, татысь Кукуй гурт пӧрмиз удмурт культурая центрлы. Алевтина Николаевна ёросысь вань удмурт гуртъёсты огазеяны быгатӥз, соос понна пӧртэм ужрадъёс радъялля. Кылсярысь, сяме пыриз ни арлы быдэ ортчытъяны «Шудо табань» улосвылкуспо фестиваль. Кукуе артысь улосъёсысь но куноос вуыло, удмуртъёслэн йылолъёсынызы тодматско, табань, перепеч пӧрало. Татын нимысьтыз турмаршрут но кылдытэмын. А. Перевощикова «Купанча» ансамблен кивалтэ на.

Александр Аблаев — Грак ёрос муниципал кылдытэтлэн йырызлэн воштӥсез, «Удмурт Кенеш» огазеяськонлэн ёросысь ёзэныз кивалтӥсь. Александр Валентинович йыг-йыг сямыныз быгатӥз ёросысь удмуртъёсты огазеяны, удмурт движениез юнматыны. Лулошур-Возжи гуртын Роман Валишин писателез буре ваён ӝытъёс, Вужгуртысь Даниил Майоров писательлы сӥзем лыдӟонъёс ортчытъя. Усточи удмуртъёсын калыкез тодматыса, творческой пумиськонъёс радъялля. Ачиз но пӧртэм инструментъёсын шудэ, чебер кырӟа.

Валентина Комиссарова — «Удмурт Кенеш» огазеяськонлэн Ува ёросысь ёзэныз кивалтӥсь, «Купанча» калык ансамблен кивалтӥсь, кырӟась, удмуртлыкез утись но ӝутӥсь. Концертъёсын пӧртэм улосъёсы вуылэ, калыккуспо фестивальёсы пыриськылэ. 2013-тӥ арын Валентина Анатольевна кылдытӥз «Шунды сиос» нылпи ансамбль. Ёросазы удмурт кылэз, культураез утён но азинтон понна трос лэсьтэ. Пӧртэм проектъёсын выре. Кылсярысь, анай кылэз дышетӥсь нылпиос пӧлын лагерьёс, ужрадъёс радъялля, ачиз ик кыллы дышетэ но. Егитъёс пӧлын КВН ортчытъя.

Надежда Касаткина — Эгра ёросысь Эшъяськон юртысь суредась-модельер, «Питыран» нимо модая театрлэн директорез. Надежда Васильевна 10 ар ӵоже удмурт дӥсьлы сӥзем пӧртэм уно коллекциосын адӟытонъёс радъяз ни Удмуртилэн палэназ но. Утчаське, вашкалаысь ӝутэ вунэтэм удмурт дэремъёсты, выль шӧм пыртэ удмурт костюмъёслы. Вуриськонъя, чеберъяськонъёс, суйпосъёс, чыртывесьёс, юртъер котырын кутӥськись арбериос лэсьтонъя мастер-классъёс радъялля. Модая театраз нылпиос но, бадӟымъёс но мыло-кыдо пырисько, асьсэлы нуналлы быдэ культураысьтымы маке выльзэ усьтыса.

Андрей Герасимов – Татарстанысь удмуртъёслэн национально-культурной автономиенызы кивалтӥсь. Со сюлмаськемен, Татарстанысь удмуртъёслэсь культуразэс, кылзэс утён но азинтон сярысь 2025-тӥ арозь стратегия кылдытэмын. Со улсын пӧртэм проектъёс ортчыло. Кылсярысь, нылпи садъёсын но покчи классъёсын дышетскисьёс понна удмурт культуралы сӥзем «Мудорвай» фестиваль-конкурсэ ог 3 сюрс пинал пыриськиз ни. Гыронбыдтон праздник улсын удмурт егитъёс «БиГерд» форуме люкаськыло. 2020-тӥ арысен удмурт кылъя визьнодасьёс пӧлын конкурс ортче, Андрей Сергеевич устооссэ ачиз ик премиен дунъя.