«Удмурт кенеш» огазеяськонлэн исполкомез ортчиз

«Мынӥсь ар узыр вал ужрадъёсын, — пусйиз «Удмурт кенеш» огазеяськонлэн тӧроез Татьяна Ишматова. — Уноез ортчизы ёросъёсын но гуртъёсын, озьы ик палэнын улӥсь удмуртъёс пӧлын. Асьмеос пӧртэм юбилейёсты пусйим — 120 ар тырмиз Кузебай Гердлы, 120 ар — Ашальчи Окилы, 130 — Иосиф Наговицынлы. Собере кема дасяським но ортчытим удмуртъёслэн нырысетӥ ӧтчамзылы 100 ар тырмонлы сӥзем ужрадъёсты».

Озьы ик «Удмурт кенеш» огазеяськонлэн исполкомез Эрик Батуев нимо премилэсь лауреатъёссэ шараяз. Быръемын 3 вормись.

«Туэ конкурсэ вазиськиз аслаз ужъёсыныз 7 журналист, — вера Эрик Батуев нимо премиез сётъянъя ӧрилэн ёзчиез Зинаида Рябинина. — Туж шумпотымон, соос пӧлын вань ёросъёсысь гожъяськисьёс, малы ке шуоно соос таӵе ӵошатсконэ пыриськыны керпотогес элькун журналистъёслэсь. Но соос озьы ик туж мыло-кыдо, быгатыса, усто гожъясько. Шумпотыса верам потэ, туэ ар понна одӥгез вормись луиз ӵапак ёросысь журналист».

Эрик Батуев нимо премилэсь лауреатъёссэ данъялозы толшоре.

http://www.myudm.ru/