«Удмурт Кенеш» огазеяськонлэн Эгра ёросысь активез люкаськылӥз
Удмуртилэн кунлык басьтэмез дырысен 100 ар тырмонэзлы дасяськон, Кедра Митрей нимо ёрос премиез сётон, ёросысь Данъян пул вылэ ӵектэм муртэз быръён, кылбур лыдӟонъя «Жильыртэ Кедра ошмес» ужрадэз ортчытон, удмурт кылэз дышетонъя курсъёсты азинтон, удмурт дӥськутлы сӥзем ужрадъёсты дасян но мукет. Ужзы трос гинэ вылэм.
Эграысь «Удмурт кенеш» огазеяськонлэн ёзэтэзлэн кивалтӥсез Татьяна Мосова та дыре ортчись «ЧЕБЕРАЙ» вожвылъяськонлэн быръён люкетэз пумысен но вераськиз. «Вожвылъяськонлэн Эгра пала вуон черодэз вуоно аре гинэ ке но ай, дасяськонъёсты али ик кутсконо ни, радъян инты утчано, вань заявкаосты ӝоген келяса вуоно шуиз кивалтӥсьмы, — вера огазеяськонлэн одӥгез ёзчиез Надежда Данилова.
Со сяна, котькуд ортчись заседаниосазы Эграысь «кенешчиос» азинлык басьтэмъёсын пумиськыло. Та нуналъёсы тодмо луиз Эграысь»Алёнушка» нылпи сад Россиысь 500 устоосыз пӧлы пыриз шуыса. Садысь ужасьёс ӵошатсконэ пыриськемзы сярысь ивортӥзы. Н.Даниловалэн верамезъя, вормыны юрттэм садазы удмуртлыкен герӟаськем ужрадъёс нуэм но. «Ӵапак милям отын «Пичи Чеберай но пичи Батыр» нылпиос понна вожвылъяськон радъяськылэ» — шуэ Н.Данилова.