“Удмурт кенеш” огазеяськонлэн азьветлӥсьёсыз Элькун Тӧроен пумиськылӥзы

Онлайн трансляция Александра Бречалова с представителем удмурт кенеш Татьяной Ишматовой

Ужрад улсын кенешчиос шаерлэн кивалтӥсезлы проектъёссы но асьсэ кужмынызы радъям ужрадъёссы сярысь веразы

2019-тӥ арысен ини Азьмурт грантъёсъя Фондлэн юрттэменыз «Удмурт Кенешлэн» нылкышно творчествоя “Чеберай” марафонэз ортчытӥське. Со Удмуртиын одӥгез яркытэз но тужгес бадӟымез йӧскалык ӵектос луэ. «Чеберай» марафон кышномуртлэн чеберлыкез пыр удмурт йӧскалык лулчеберетэз но киужез вӧлмытыны, удмурт нылкышноослэсь гуртъёсын улонзэс творчество но ужбергатон пыр ӟечлыкогес карыны, тужгес устолыко удмурт нылашъёсты но кышномуртъёсты шараяны, быгатонлыкъёссэс калыке поттыны но азинтыны чакламын.

Марафон улсын туннэ нуналлы ортчоно ужрадъёсын ӵектослэн кивалтӥсез Ксения Широбокова тодматӥз: «Али дыре марафонлэн командаез «Cheberai» журнал поттон бордын тырше. Отчы «Чеберай-2020» вожвылъяськонлэн быръён люкетаз вормись нылашъёслэн но нылкышноослэн киужъёсын мастер-классъёсы пырозы. Озьы ик «Чеберай – 2020» вожвылъяськонлэн фналэзлы дасяськон мынэ. Со таяз арын шуркынмон толэзе Ижкарысь «Металлург» лулчеберетъя юртын ортчытыны чакламын».

"Удмурт кенеш" огазеяськонлэн азьветлӥсьёсыз Элькун Тӧроен пумиськылӥзы

Александр Бречалов «Чеберай» марафонэз туж вылӥ дунъяз. Лулчеберетмес утеммы потэ ке, таӵе устоесь проектъёс кылдытъяно, соосыз егитъёс пӧлын возьматыны дышетсконо шуиз кивалтӥсь.

«Удмурт Кенеш» туж ӟеч кусып возе Удмурт кун университетэн но. Школаосын дышетскись нылпиос но студентъёс понна котькуд ар пӧртэм ужрадъёс ортчытъясько. Тужгес бадӟымез со «Наукае нырысетӥ вамышъёсы» эскорон ужъёсын но проектъёсын улосвылкуспо ӵошатскон. Куинетӥзэ ини ортчиз Юрий Перевощиков нимо визьбур многоборье. Со 7-тӥ-11-тӥ классын дышетскись пиналъёс пӧлын радъяське. Соолэсь удмурт кылъя, экономикая но обществознания тодон-валанъёссэс эскеро.

УдГУ-ысь Удмурт кылосбуръя, финно-угроведениея но журналистикая институтлэн кивалтӥсез Наталья Кондратьевалэн верамезъя, таӵе ужрадъёс нырысь ик удмурт кылэз но лулчеберетэз азинтон понна лэсьтӥсько. «Лингвист кадь, мон вераны быгатӥсько, жаляса верано, трос пӧртэм мугъёсъя, удмурт кылэз тодӥсьёс арысь аре кулэсмо. Но нылпиос вераськизы ке, кылмы улоз», – шуиз со.

Трос ужъёс нуисько ёросъёсын но. Асьсэ кужмынызы радъям ужрадъёссы сярысь вераськизы «Удмурт Кенешлэн» ёзэтъёсынызы кивалтӥсьёс. Кылсярысь, Дэри ёросын тужгес бадӟым саклык висъяны тыршо улосчиосмылы, кудъёсыз асьсэлэн уженызы, быгатымлыкенызы данъязы асьмелэсь ошмесо Удмурт шаермес.

"Удмурт кенеш" огазеяськонлэн азьветлӥсьёсыз Элькун Тӧроен пумиськылӥзы

Глаз ёросын кенешчиос Иосиф Наговицынлэсь нимзэ ӝутонын тыршо. Со удмурт автономиез кылдытӥсьёс пӧлысь одӥгез вал. Туэ, Удмуртилэн кунлыкезлы 100 ар тырмон аре, Глазкарын удмурт кылэз дышетонэн гимнази классъёс усьтӥськозы. Нош азьланяз, «Удмурт Кенеш» огазеяськонлэн Глаз карысь но ёросысь ёзэтэзлэн кивалтӥсез Инесса Рябова верамезъя, кенешчиос школалы Иосиф Наговицынлэсь нимзэ сётыны ӵектонэн потыны малпало.

ивор басьтэмын Удмурт кенеш огазеяськонлэн сайтысьтыз

Контентмейкер, мемолог и журналист

Дом Дружбы народов
Добавить комментарий