Удмурт калыклы сӥзем выль бичет поттӥз «Удмуртия» издательство
![Удмурт калыклы сӥзем выль бичет поттӥз «удмуртия» издательство 1](https://udmddn.ru/wp-content/uploads/2017/11/iz.jpg)
«Татын милям статьяос пыр возьматэмын удмурт калыклэн, 1136-тӥ арысен кутскыса, куке араб путешественник Хабу ал-Гарнати нырысьсэ вераз, удмуртъёс дунне вылын вань шуыса, но туала вакытозь историез, — шуиз Георгий Грязев.
Кылсярысь, бичетэ пыртэмын Герард Миллерлэн азьло дауръёсы туала Удмуртилэн интывылаз вуылэмез, удмуртъёсын пумиськемез сярысь малпанъёсыз, Михаил Ломоносовлэн верамъёсыз, Иван Михеевлэн, Людмила Христолюбовалэн статьяоссы. Елена Трофимовалэн пельнянь сярысь гожтэмез борды рецептъёс ватсамын.
Вераны кулэ, книгаысь трос туспуктэмъёсты но суредъёсты адӟыны луэ — кызьы вашкалаоссэ, озьы ик туалаоссэ но.
«Котькуд статья чебересь туспуктэмъёсын узырмытэмын, суредъёсын. Нимысьтыз вераны кулэ Валентин Белых сярысь, со нош ик милемлы юрттӥз та книгаез чеберманы, яркытгес карыны, кие кутымон карыны. Тани вылаз ик пуктэмын солэн «Удмуртлык» суредэз, кытын быдэс удмурт калыклэн историез адӟиське», — ватсаз Георгий Грязев.
Книга 500 экземплярен потӥз. Издательствоысь валтӥсь редактор верамъя, кулэяськон луиз ке, мукетъёссэ бичетъёссы тросэнгес печатлалозы. Малпазы вань быдэс сузьет лэсьтыны но котькуд ар та выллем книгаос поттыны.
Георгий Грязевлэн верамезъя, таӵе бичет лэсьтыны мылкыдзы ӝутскиз Москвае книгаосын ярмаркае ветлэмзы бере.
«Москвае книжной выставкаез ветлэммы бере шӧдӥмы, милям уг тырмо (книгаосмы — ред.) палэнын улӥсьёслы, ӟуч калыклы валэктыны удмуртъёс сярысь, возьматыны солэсь чеберлыксэ, аспӧртэмлыксэ, мукет калыкъёслэсь маин висъяське шуыса, маин данъяськыны быгатэ удмурт калык шуыса», — валэктӥз Георгий Грязев.
Тодэ вайытом, 2017-тӥ арын «Удмуртия» издательстволэн куинь книгаосыз Росси вожвылъяськонъёслэн вормисьёсыз пӧлы шедизы, нош «Удмуртские народные мифы и легенды» Россиысь устоосыз книгаос пӧлы пыриз.