Удмурт калыкез — одӥг гердэ!

Александр Шкляев за трибуной читает с листа

Филология наукаосъя кандидатлэн Александр Шкляевлэн докладэз, «Герд лыдӟонъёс-2019»

Паймоно: кыӵе егит на вал Кузебай Герд, куке со меӵак пыриськыны кутскиз политикае. Кыӵе со сюлмаськиз удмуртъёслэсь асваланзэс ӝутон понна!

Кузебай Гердлэн кылбуреныз усьтӥське «Гудыри» газетлэн нырысетӥ номерез. 1920-тӥ арысен со кыл кутэ удмурт комиссариатын книга поттон удыс понна.

1921-тӥ арын люкаськиз удмурт писательёслэн съездзы — со отын лэсьтэ ни доклад. Автономия ӧвӧл на, со гожтэ ни гимн. Гожъямъёсыз улэ гожтӥське «Андан», «Сюмори», «Адями», но дугдэ «Герд» кыл вылэ. Удмурт калыкез огазеяно одӥг гердэ — сыӵе малпанэ со вуэ.

К. Гердлы 20-22 арес, нош со малпаське ни: удмуртъёслы кунлык басьтоно, син азяз пуктыны выре, кыӵе со луыны кулэ. Литератураын вань азьлань улонэз син азе пуктыса гожъяськон — футурология, футуризм, (футурум — азьпал улон). Гердэз нырысетӥ удмурт футурист шуыны луоз. Футурист вал В. Маяковский но. 1918-тӥ арын, азьланез сярысь малпаськыса, ӟуч кылбурчи газет поттэ, йыръяназ пуктэ таӵе отён: «Сбросим Пушкина с парохода современности!» Удмуртъёслэн А. Пушкин интыын вал калык кылос (фольклор). Но К. Герд сое люканы, со вылэ пыкиськыны ӧте. В. Брюсовлы гожтэ «Дэквяла» эпосэз сярысь. Озьыен, со малпа ни вал аслаз этносэзлэн азьланьын улонэз сярысь. Геройлыко эпос — со национальной самосознанилэн инъетэз.

Азьланьзэ дурон пумысен К. Герд вазиське удмурт калыклы, сое нимысьтыз сӥен-сӥен чакласа: пиослы — нылъёслы, покчиослы — пересьёслы, кышномуртъёслы — воргоронъёслы, байёслы — куанеръёслы, кенешо власть понна ожмаськисьёслы но дезертиръёслы, гуртын но городын улӥсьёслы, заводын но колхозын ужасьёслы, кивалтӥсьёслы, бригадиръёслы но огшоры ужасьёслы, ӟучъёслы но удмуртъёслы. Со социолог кадь учке калык шоры но вала: котькуд арлыдлэн, котькуд социальной группалэн вань аслаз аспӧртэмлыкез, котькудӥзлы вазиськыны кулэ нимаз. Озьы со басьтӥське дышетон книгаос гожтон борды. Котькудӥз адями азе пуктэ ужпум. Валамон, нырысь ик литература но искусство азе:

Эй!

Изчиос,

Кылбурчиос,

Крезьгурчиос!

Нош тӥ —

Суредчиос,

Усточиос!

Тӥ

Данъялэ туннэ

Ужам ужмес!..

Тӥ ӝутэ,

бурдъялэ

Ӝуась

сюлэмъёсмес!

Тӥляд

крезьгуръёсты,

Пазьгем

кырӟанъёсты

Колхоз бусы кадь

мед эркиялоз

синмес!

Гердлэн малпанэз — удмурт калыкез котыр ласянь улӟытоно. Улон-вылонэз умоятэм сяна, национальной ужпумъёслы но саклык висъяно. Куд-ог политикъёс шуо вал: дыртоно ӧвӧл, нырысь калыклэсь улонзэ умоятоно, собере ини пӧртэм выжы калыкъёслэсь сюлмаськонъёссэс сэрттоно-пертчоно. Нош Герд пумитъяськиз: кытчы берлолы кельтоно, калык бырем бере-а, мар-а? Ӧвӧл-ӧвӧл, социальной ужпумъёсты сэрттыны-пертчыны ӵапак удмурт кыл кулэ. Удмурт кылэз, удмурт культураез ӝутыса, вань ужпумъёсты со пыр сэрттоно-пертчоно. Удмурт кылэз котькытчы пыртон — удмурт адямилэсь данзэ ӝутон.

Герд суреда таӵе югдурез. Трос аръёс азьлогес нуллӥ, пе, городэ синтэм мумиме. Со кышказ аптекае но пырыны, ӟуч кылэз уг валаськы шуыса. Ортчизы аръёс, кылбурчи нош ик пыре со аптекае, но мукет муген.

Дас вить ар ни

со дырысь ортчиз.

Мемие синтэм луса кулӥз.

Нош туннэ мон кыктэтсэ

пыри со син эмъянние,

Мон пумитэ

лыктэ эмъясь,

Со ӟуч ке но, ачиз

Шорам вазе

удмурт кылын.

Ас эшеныз кадь вераське

Удмурт кышноосын.

Кызьы кулэ

синэз утялтыны,

Малы таза сӥльвир

кулэ тыныд…

Мон котырын —

удмурт кыл-шур.

К. Герд туж лэчыт пуктэ вал удмуртлыкен герӟаськем ужпумъёсты. Но соку тросэз уг валало вал сое, соин ик К. Герд туж ӧпкельылӥз, туж чигиськылӥз.

Мар бен, зэмазы-а Гердлэн чидан сярысь осконъёсыз-дэмланъёсыз. Зэмазы. Гердлы туннэ 2 памятник пуктэмын ини. Вазь-а, бер-а, но калык улыса-вылыса дунъя ик аслэсьтыз азьветлӥсьсэ.

Зэм, трос ужпумъёс, кудъёсыз пумысен малпаськылӥз К. Герд, туннэ но быдэстэмын ӧвӧл, нош кытын-отын мыдлань кошкемын, куд-ог ужпумъёс уката но лэчытомемын. Туннэ шуг шедьтыны сыӵе аудиториез, кытын удмурт кылын вераськыны луэ. Ичиёмо удмурт кылын передачаос, ыше ёрос радио, куд-ог изданиос пото ини 2 кылын, удмурт кыллэсь интызэ шымыртыса.

Куке но Геннадий Красильников писатель шуиз вал: «Удмурт интеллигенция вордске гуртын но быре городын». Но туннэ городысь куд-ог школаосы удмурт кылэз пыртэмен, оскон кылдэ ик, карын удмурт интеллигенция возиськоз шуыса. Озьы ик туннэ удмурт кылэз, удмурт проектъёсты азинтонын бадӟым инты басьто социальной сетьёс. Со ласянь бадӟым уж лэсьто Интернетысь бамъёсазы трос гожъяськисьёс. Соин ик макем паськыт вӧлмоз Интернет, макем тросгес луозы удмурт блогеръёс, сокем мургес пыӵалоз удмурт кыл.

Оцените статью
Дом Дружбы народов
Добавить комментарий