Удмурт калык дӥськутъёсты возьматозы Йӧскалык дӥсьлэн элькун праздниказ Башкортостанын
«Котькуд калык аслэсьтыз кырӟанъёссэ кырӟаса мынэ. Асьсэ костюменыз луэ чур, шуом, удмуртъёслэн чурзы нимаз. Ну, отын финн-угор, тюрк, армян, еврей — тӥни озьы люкыло но, мынӥськом. Ми поръёсын, чувашъёсын, мордваен удмуртъёсын ӵош мынӥськом. Котькуд калык возьматэ аслэсьтыз пӧртэм-пӧртэм костюмъёссэ: туалазэ но, куэмзэ но», — вера Ирина Самигулова, Выль Татышлыысь Историяя но лулчеберетъя удмурт центрысь валтӥсь ӧнерчи.
Со верамъя, туннэ нуналлы быръемын ӧвӧл на, кин туэ праздникын удмурт дӥськутэз возьматоз. Кылсярысь, кылем арын шестивие Вязовка черкогуртысь фольклоръя «Уӵы ныл» калык коллектив ветлӥз. Таяз арын но элькунысь кудзэ ке калык коллективез ыстом, дыр, шуиз Ирина Самигулова. Со сяна, Йӧскалык дӥсьлэн праздниказ Башкортостанысь удмурт нылкышноослэн клубзы пыриськоз.