Удмурт ибырвесь лэсьтонъя конкурс ялӥзы пиналъёс пӧлын Удмуртиын

    Удмурт ибырвесь лэсьтонъя конкурс ялӥзы пиналъёс пӧлын удмуртиын 1

    «Конкурс Кунлык нуналлы тупатэмын. Озьы ик али, шуркынмонэ, элькунын удмурт кылъя месячник. Тӥни солы но сӥземын», — вера Алина Чернова, «Шунды» огазеяськонлэн кивалтӥсез.

    Солэн кылъёсызъя, пиналъёс ужазы котькыӵе материал кутыны быгато. Удмурт ибырвесьлэсь формазэ но соос ас мылкыдзыя быръё. Озьы ик лэсьтэм арберизы сярысь одно ик легенда яке выжыкыл гожтоно. Котькуд класс кылдытэм ужзылэсь туспуктэмзэ «ВКонтакте» мерлыко вотэсбамысь «Шундысиос» движенилэн огиназ 12-18 шуркынмонэ интыяны кулэ.

    Алина Чернова пусйиз, «Шундысиос» движение пыриськись школаос, соос али 30 пала, дышетскон ар ӵоже толэзьлы быдэ пӧртэм вожвылъяськонъёсы пырисько. Удмурт ибырвесь лэсьтонъя конкурс соос пӧлысь одӥгез. Котькуд лэсьтэм задание понна класс баллъёс басьтыны быгатэ. Дышетскон ар пумын радъясьёс йылпумъянъёс лэсьто – тужгес трос балл люкам класс устоез луэ но кузьым басьтэ.