Удмурт Элькунлэн Тӧроез мерлыко огазеяськонъёслэн ёзчиосынызы пумиськиз

    Тӧромы элькунмылэн экономика но мерлык удысъёсын огъя азинтӥськемез сярысь вераз, промышленность но гуртвозёс предприятиослэн ужъёссылы палар понна йылпумъянъёс лэсьтӥз, улосвыламы быдэстӥськись ӵектосъёс сярысь мадиз.

    Александр Васильевичлэн пусъемезъя, элькунмы азинтӥське огъя калыклэн ужъёсыныз. «Адямилэн йӧслыкез мон понна валтӥсь уг луы. Котькуд адями аслаз ужан интыяз лулысь-сюлмысь мед тыршоз, ӵош ужась эшъёссэ, бускельёссэ, котырысь адямиосты мед гажалоз – тини ма валтӥсь луэ. Со бордысь мон адӟисько мерлыклэсь огсыр азинтӥськемзэ»,- шуиз Александр Соловьёв.

    Пумиськонлэн кыкетӥ люкетэз кенешон-вераськон форматэн ортчиз. Мерлыко огазеяськонъёслэн азьветлӥсьёссы асьсэлэн ужъёссы, шуг-секытъёссы, сюлэмшугъёссы сярысь мадизы, шаерамы улӥсь калыкъёслэсь кусыпъёссэс юнматыны ӵектонъёс сётӥзы.

    Кылсярысь, «Урарту» армян мерлыко огазеяськонлэн кивалтӥсез М.М. Аракелян пичиосты нылпи садын визьнодан юанэз ӝутӥз. Мнацакан Миружанович нылпи садын ужасьёслы, арнянуналэ ужась школаосысь дышетӥсьёслы уждунзэс будэтыны ӵектӥз.

    Пумиськонэ лыктэмъёс пусйизы элькун кивалтэтлэсь мерлыко огазеяськонъёсын ӟеч ужамзэ. Элькун Тӧролы ӵектӥзы мерлыко огазеяськонъёс, калыкъёслэн сям-йылолъёссы сярысь телевидениын нимысьтыз программаос дасяны. Соос юрттозы артэ улӥсь калыкъёслы ог-огзэс мургес тодыны. Александр Васильевич та юанэз рос-прос эскерыны-дасяны куриз йӧскалык политикая министрез Л.Н. Бурановаез.

    А.В. Соловьёв тау кариз пумиськонэ лыктэмъёслэн ӵектонъёссылы, азьланяз но таӵе кенешъёс луозы шуыса оскытӥз.