Удмурт егитъёслэн лулчеберетъя «Тысь!» фестивальзы ортчоз Ижкарын
18 часысен 22 часозь музейлэн азбараз крезьгуръёс чузъяськозы, туала удмурт модаез возьматозы, шудонъёс, эктонъёс, мастер-классъёс ортчозы.
«Сыӵе ӟучгес, дыр, формат — ӟучьёслы но кадь мед кельшоз, удмуртсэ кыӵе ке мукет сяменгес возьматыны, дышем удмурт эстрада гинэ ӧвӧл, экспериментальной, туалагес. Отын концерт гинэ уз луы, озьы ик дизайн, адӟытон-ярмарка, одно ик мода луоз — аслам коллекцие вань, Софи Разиналэн коллекциез луоз. Артистъёс но туж пӧртэмесь, жанрзыя но», — вераз программаез кылдытӥсь Дарали Лели.
Кылсярысь, лыктоз Можгаысь «Элькуновидение» вожвылъяськонэ пыриськем Мария Гроздова. Дарали Лелилэн верамезъя, солэн кырӟанъёсыз гуртын улӥсьёслы, оло, муртгес луо, но карын улӥсьёслы со кельше. Ксения Ахметханова шундыпуксён палась кунъёслы тупасьгес крезьгуръёс гожтэменыз висъяське. Туала кырӟанъёсты быдэстоз но Татарстанысь бавлы удмуртъёслэн гуръёсынызы тодматоз 2017-тӥ арын ӧжыт лыдъем калыкъёслэн кылъёсынызы кырӟанъя Liet International калыккуспо конкурсын куинетӥ инты басьтэм Павел Александров.
«Мон яратӥсько тодматыны соосын, кин мар ке но выльзэ лэсьтэ, мае мукетъёсыз уг лэсьто. Сыӵе «эксклюзивной», аспӧртэм ӧрез-а, мар-а. Котьма ке но, утчасько выльзэ кылдытӥсь артистъёсты, ӵектосъёсты», — валэктӥз программалэсь пуштроссэ кылдытӥсез.
Ужрадлэн кутсконаз егитъёсын философи тодосъя кандидат Альберт Разин пумиськоз. 2017-тӥ арын оштолэзе тодосчи «Дарт» газет пумысен керӟегъяськемзэ вераз, со «удмуртлыклы пумит ужа» шуиз. Фестивальын котькудӥз аслэсьтыз мылкыдзэ, улон шоры учкемзэ вераны быгатоз.
Озьы ик егит гожъясьлэсь Мария Векшиналэн выль романысьтыз люкетъёссэ лыдӟозы. Тылын шудоз TylNyl — али Ярославльын улӥсь Мария Игонина.