«Удмурт дунне» газет нош ик быръе «Гурт адямиез»

Вожвылъяськонын куинь номинация ялэмын:

— «Устоез кивалтӥсь» номинациын вожвылъясько гурт администрациен, предприятиен кивалтӥсьёс. Соос огшоры гурт калыклэн улоназ пырисько, сюлмаськонъёссэс кылзыны быгато, юрттэт сёто.

— «Выжыоссэ утись» номинаце пырисько калык фольклорез люкась, гурт историзэс утись но соосты егитъёслы сётыны быгатӥсь муртъёс.

— «Ӟеч сюлэм» номинаци тодматэ ӟеч ужъёс лэсьтыны дыр шедьтӥсь адямиосын: улосчиосызлэн тазалыксы сярысь сюлмаське, адямиослэн пӧртэм тунсыкъяськонъёссыя клубъёс нуэ.

«Тужгес но тунсыко, куке гуртоос ӵектоно адямиоссы сярысь лэсьто зарисовкаос, статьяос келяло, — шуэ «Удмурт дунне» газетлэн валтӥсь редакторез Зинаида Рябинина, — малы ке шуоно отын фамилия гинэ ӧвӧл, отын вань ивортон. Вань лыдӟисьёс, быдэс республика тодэ ни, кин со адями. Сыӵе зарисовкаосты лыдӟыны туж тунсыко. Чакламмыя соос ик тросгес куара люкало».

Синмаськымон адямиосын куриськонъёс-ӵектонъёс кутӥсько выль арозь. Собере куара сётон ялэмын луоз. Куара сётонэ асьсэос ик гуртоос пыриськозы. Со «Удмурт дунне» газетлэсь сайтаз но мерлыко вотэсбамъёсаз мыноз. Озьы ик ялэмын луоз кинюртэмъёсты люкан. Куара сётон тулыс кутсконозь мыноз. Собере тодмо луозы вормисьёс.