Ӟуч Пычасын усьтӥськиз ӟуч лулчеберетъя шорюрт

Кунооссэс Ӟуч Пычас гуртын улӥсьёс дышем сямъя пыжем нянь колдыен пумитазы. Выль шорюртазы пырыку, горд лентаез вандӥзы. Та бадӟым ужрадэн ӟечкылазы Удмурт Элькунысь ӟуч лулчеберетъя мерлыко огазеяськонлэн кивалтӥсезлэн воштӥсез Светлана Васильевна Щапова, Калыкъёслэн Эшъяськон юртсылэн мерлыко кусыпъёсъя воштӥсез Раиса Владимировна Солонинко, «Мельниковское» муниципал кылдытэтлэн йырыз Геннадий Иванович Шуклин но мукетъёсыз.

Собере вань лыктэмъёс учкизы Вашкала ӟуч кырӟанлы сӥзем праздникез. Вашкала сям-йылолъёсын, кырӟанъёсын, эктонъёсын тодматӥзы Можга ёросысь коллективъёс. Асьсэлэн быгатонлыкъёсынызы паймытӥзы Пычас, Горняк, Мельниково, Октябрьской гуртъёсысь фольклор ансамбльёс. Ӟуч Пычас гуртысь «Калинушка» ансамбль «Ныл куран» сям-йылолэз возьматӥз. Та коллектив 30 арлэсь кема ужа ни. Ансамбле ветлӥсьёс музей комнатае вашкала арбериос бичало, гуртсылэн историезъя материалъёс люкало.

Шорюрт вӧзысь гуждор вылын пӧртэм мастер-классъёс, шудонъёс, хороводъёс радъяськизы. Тужгес тунсыко потӥзы куноослы «Прялка и пряха — ниточка души», «Девичья краса» нимо вожвылъяськонъёс.