Ӟуч лулчеберетъя этнографи форум ортчоз Сарапул ёросын

Кыче ӟуч адямилэн лулыз, мар со сыӵе ӟуч кырӟан — та но мукет юанъёслы зэмос валэктон утча но сётэ ӟуч лулчеберетлы сӥзем «Высокий берег» фестиваль. Туэ со Сарапул ёросын 9-тӥзэ ортчоз.

«Фестиваль дыръя кылӥське ӟуч кырӟан — со номырин но, нокызьы но выльдэмын ӧвӧл. Со кылдытэ аутентичной омыр. Фестивальын со туж тунсыко но мон понна туж дуно. Россиысь ӧжыт интыосын сыӵе атмосфера кылдытыны быгато. Со понна ик мыным туж кельше та фестиваль», — вера йӧскалык политикая элькун министр Лариса Буранова.

Туэ «Высокий берег» ӵектос Президент Фондысь утэм гранд чотын радъяськоз Нечкиноын 3-тӥ – 7-тӥ пӧсьтолэзе. Со ӟуч калык кырӟан-эктонъёс гинэ ӧвӧл, со — тодосъя конференциос но.

«Ми доры лыкто пӧртэм улосвылъёсысь коллекивъёс, — шуэ туризмъя «Высокий берег» центрлэн кивалтӥсез Ирина Третьякова. – Соос сьӧразы ваё фестиваль улсын ик Удмуртилэн ӟуч ёросъёсаз экспедициын люкам материалзэс».

Таяз радэ но Йошкар-Олаысь, Казаньысь, Пермьысь, Ижкарысь ӟуч огазеяськонъёс Удмуртилэн лымшор ёросъёстӥз экспедициен ортчозы. Ӟуч гуртъесысь люкам материалъёсын вуоно арын та фестивальын ик тодматскыны луоз.

«Форум ӟуч лулчеберетэз улӟытонэн, утёнэн, азинтонэн тунсыкъяськисъёсты огазея. Со ужан амалъёсын люкиськонъя, этнографи материалъёсты люканъя тунсыко площадка луэ», — шуэ «Высокий берег» центрлэн кивалтӥсез Ирина Третьякова.