Тупал удмуртъёс дорын культуралы сӥзем нуналъёс азьланьтӥсько

Бускель улосвылъёсын улӥсь удмуртъёс дорын удмурт культуралы сӥзем нуналъёс азьланьтӥсько. Эшшо одӥгез пумиськон ортчиз Киров улосвылысь Уни каргуртын.

Ужрад пленарной люкетэн кутскиз. Вань люксаськемъёсты пумитаса вераськизы элькунысьтымы йӧскалык политикая министр Эдуард Петров, Уни муниципал кылдытэт администрацилэн кивалтӥсезлэн воштӥсез Иван Машковцев, Киров улосысь Калыкъёслэн эшъяськон юртсылэн валтӥсь ужъёсызъя директорлэн воштӥсез Ирина Никитина.

Пумиськон азьланьтӥськиз тематической площадкаосын. Пусъём, котькуд улосын соос пӧртэмесь луо. Таяз радэ но дасямын вал Киров улосвылын улӥсь удмуртъёслэн куронъёсызъя. «Чипчирган» ансамбльлэн хореографез Лилия Леонтьева удмурт калык эктонъёсъя но шудонъёсъя мастер-класс возьматӥз, «Арт-резиденциысь» ӧнерчи Дарали Лели йӧскалык дэремъёслэн аспӧртэмлыкъёссы сярысь вераськиз, Калыкъёслэн эшъяськон юртысьтызы ужасьёс удмурт егитъёслэн азинлыко ӵектосъёсынызы тодматӥзы. Нимысьтыз «Удмурт Кенешлэн» площадкаез но ужаз. Татын удмурт кылэз но лучберетэз утён, азинтон но вӧлмытон пумысен юанъёсты сэрттӥзы-пертчизы.

Пумиськон Ижкарысь «Чипчирган» ансамбльлэн концертэныз йылпумъяськиз.