Туннэ анай кыллэн калыккуспо нуналыз

Та нуналэ Эграысь автобусъёсын удмурт кырӟан гуръёс чузъяськизы, Ярын – «Этновидение» акци ялӥзы. Со улсын котькудӥз мылкыд карись «Мон удмурт кылын вераськисько» видеоролик гожтыса вотэсбамъёсы келяны быгатӥз.

Нош Пичи Пурга черкогуртын улисьёс азьланьто удмурт калык дӥськутэн уж дуре потон акцизэс. Соос борды туэ итӥськизы Дэри, Сюмси, Яр ёросъёсысь удмуртъёс.

Удмурт дэремен туннэ Пичи Пурга ёросын улӥсьёсты уд паймыты — бадӟымъёслэн но пичиослэн, кивалтӥсьёслэн но дорын пукисьёслэн со гардеробазы вань. Ёрослэн выль тӧроез Сергей Юрин но ужан интыяз туж синмаськымон адӟиськиз удмурт дӥсеныз.

«Мон шумпотыса удмуртлыкмес утён борды итӥськисько, мед со паськтылоз, вӧлмоз. Асьмеос сое нылпиосмылы но возьматыны кулэ», — шуиз Сергей Юрин.

Ортчемзэ учконо ке, ёросын удмурт дэремез нуллэмысь ӧз но дугдылэ. Вань гуртъёсысь песянайёслэн со валтӥсь дӥськутсы. Табере нош модельер Татьяна Москвиналы луыса, татын егитъёс но, пичиос но ӵемгес ини удмурт сямен дӥсясько.

http://www.myudm.ru/