Тулыспалэ Сюмсиын удмурт кылъя курсъёс кутскозы
«Милемлы 15 адями кулэ, ӧжытэзтэк бичам ини, 1–2 адями шедьтом на малпасько», — шуиз курсъёсты нуись, Сюмси ёрос газетысь корреспондент Раиса Волкова.
Солэн верамезъя, Сюмси ёросын удмурт кылъя курсъёс кылем арын но ортчытӥзы вал ини, но туэ соос нырысьсэ Йӧскалык политикая министерство пыр радъяськозы.
«Кылем арын нуим вал кык группа, огаз воксё валасьтэмъёс, мукетаз — пичияк валасьёс. Но министерство пыр ӧм, ас мылкыдмыя, «Удмурт нылкышно кенеш» огазеяськон пыр. Соку ми ужамы Сюмси школаысь дышетӥсен Ольга Квакинаен, туэ со уг быгаты, соин ик мон огнам нуо», — вераз со.
Туэ курсъёсы гожтӥськемъёс пӧлын дышетон удысын, администрациын ужасьёс, егитъёс, шор арлыдъемъёс вань. Пӧлазы ик кылем арын ветлэмъёс но.
Кыллы дышетэм сяна, курсъёсы гожтӥськисьёсты удмурт лулчеберетэн но тодмато.
«Кылем арын ми дорын Гербер вал. Соин нырысь ик кызьы куноосты пумитано, кызьы утялтоно, кызьы вераськоно, кызьы келяно дышетӥм. Куинь толэзь ӵоже адямиен уго уд быгаты удмурт сямен вераськыны. Со туж ӧжыт. Соин ик огъя валанзы мед луоз кыл сярысь, кызьы вераськоно. Нош кылэз дышетон понна аръёс кулэ», — валэктӥз удмурт кылъя курсъёсты радъясь.
Нырысетӥ уроксы 1-тӥ тулыспалэ ортчоз. Дышетон Сюмси школаын радъяськоз. Куинь толэзьем курсъёс бере дышетскем адямиос сертификатъёс басьтозы.
Раиса Волковалэн верамезъя, туннэ нуналлы Сюмси ёросын удмурт кылэз Орловское черкогуртын гинэ дышето. Эшшо кӧня ке школаосын но нылпи садъёсын удмурт кылэз кружок, факультатив сямен нуо.