Тулыспалэ Глазкарын удмурт лулчеберетлы сӥзем нуналъёс ортчозы

    Тулыспалэ глазкарын удмурт лулчеберетлы сӥзем нуналъёс ортчозы 1

    «Малпаськом усьтыны клуб «Зарни бугор», малы ке шуоно вань визьнодасьёс, Глазкарын но нылпи садъёсын ужасьёс, — вера «Удмурт Кенешлэн» Глазкарысь но ёросысь ёзэтэныз кивалтӥсьлэн воштӥсез, Удмуртиысь Калыкъёслэн Эшъяськон юртысьтызы муниципал кылдытэтъёсын ужанъя ёзэтысь валтӥсь методист Антонида Бёрдова. Соос егитэсь, удмурт кылын вераськисесь, туж рос-прос пырисько удмурт ужрадъёсы. Соосъя, соослэн кутскемзыя, нылпи садъёс Глазкарын пырисько котькуд аре элькун конкурсэ «Пичи Чеберайёс но Батыръёс», «Выжы-выжы-выжыкыл». Соос ӵошгес мед люкаськылозы шуыса малпаськом. Тӥни со «Зарни бугор» клуб соослы луоз юрттэт ужаназы, малы ке шуоно со дышетон ӧръя ужась клуб. Со милям нырысьсэ».

    «Зарни бугор» клубез Глазкарын 14-тӥ тулыспалэ усьтыны чаклало. Ужрадэ «Удмурт нылкышно кенеш» огазеяськонлэсь кивалтӥсьсэ Надежда Степановаез но отысь азьветлӥсьёсты ӧтьыны малпало.

    «Ортчоз азьло презентация, кызьы ужаз «Зарни бугор» элькунамы мукет ёросъёсын, нош собере малпалом, маин ужаны кулэ клуб «Зарни бугор». Оло, визьнодасьёслэн ӵектонъёссы луозы. Ужанрадлык выллем кылдытом. Собере малпаськиськом кыӵе ке дышетон тема мед луоз шуыса», — вераз Бёрдова.

    Со сяна, карысь удмурт семьяослы но клуб усьтыны малпало. Юрттэт сётыны дась луэмзэ Надежда Степанова но верам ини. Антонида Бёрдовалэн верамезъя, клуб удмурт семьяослы элькун конкурсъёсы, кылсярысь, «Пичи Чеберайёс но Батыръёс» вожвылъяськонэ, пыриськисьёслы юрттэт луоз. Соос быгатозы люкаськылыны, удмурт сямен вераськыны. Оло, карысь мукет удмурт семьяос шараяськозы.

    10-тӥ тулыспалэ, анай кыллэн калыккуспо нуналэзлы сӥзьыса, «Шунды» огазеяськонлэн ёзэтаз пыриськись егитъёслы литературной гостиной ортчытыны чаклало.

    «Удмурт кылбуръёсты лыдӟом, нош собере ӧтёмы… студенткамы милям вань Никонорова Альбина, кудӥз ачиз гожъя удмурт кылын. Соин тодматом, кылбуръёссэ лыдӟоз», — вераз Бёрдова.

    Солэн кылъёсызъя, удмурт лулчеберетлы сӥзем нуналъёсты соос котьку но кыӵе ке адӟытонэн усьто. Таяз радэ удмурт пейзажъёс лэсьтӥсь Юрий Дерябинлэн туспуктэмъёсыныз адӟытон усьтӥськоз.