Туэысен «Удмурт Кенеш» огазеяськон ялӥз Т. Борисов нимо премия сётъян сярысь

Пусйыны кулэ, удмурт калыклэсь синмаськымон нылъёссэ-пиоссэ, зэмос азьветлӥсьёсты Т. Борисов нимо премиен пусйыны кутскизы ни вал ог 15 ар талэсь азьло. Соку премиез сётъяз удмурт культурая «Дэмен» огазеяськон. Пӧртэм аръёсы соин пусъемын вал Россиысь калыкъёслэн ассамблеяенызы кивалтӥсь, Кун Думаысь азьвыл депутат С. Смирнова, Россиысь Конституционной судлэн азьвыл судьяез Н. Витрук, Удмуртиысь Правительстволэн Тӧроезлэн азьвыл воштӥсез Сергей Токарев, «Удмурт Кенеш» огазеяськонлэн азьвыл тӧроез Николай Мусалимов, Алнашысь «Молодая гвардия» СПК-лэн тӧроез Михаил Крылов, Т. Борисовлы но К. Гердлы синпелетъёс лэсьтэм скульптор Н. Кутлыбаев, «Удмурт дунне» газетлэн коллективез но мукетъёс.

Берло аръёсы азьветлӥсьёсмес Т. Борисов премиен пусъён уретэмын вал. Но «Удмурт Кенеш» огазеяськон та ужез выльысь улӟытоно кариськиз, выль положение дасяз. Озьы премилэн йӧнлыкез эшшо будӥз. Но кинлы сётоно «выльдэм» премиез, таяз рад споръяськон ик ӧй вал. «Удмурт Кенеш» огазеяськонлэн премиосъя комиссиез но, исполкомез но огкылысь луизы: Валериан Никитинэз пусъёно.

Валерьян Арсентьевич — зэмос удмурт азьветлӥсь, аслэсьтыз выжыоссэ, калыксэ гажась но со понна сюлмаськись адями, Удмуртиысь гурт удысысь дано ужась.

Быдэ вуэмын Балезино ёросысь Пыбъя гуртын. Армие мынон азяз Балезиноысь парсь вордонъя предприятиын слесарь, водитель луыса ужамын. Нош армиысь бертэмез бере гурт удысъя институтын дышетскиз, агроном луиз. Ужыны кутскиз Вавож ёросысь «Путь к коммунизму» колхозын. Бӧрысь семьяеныз ӵош Дэри ёросысь Ижысь Якшур гуртэ выжыяськиз, татысь «Путь Ильича» колхозын валтӥсь агроном луиз. Визьмо, тыршись, гурт ужез валась специалистлы калык вазиськиз, колхоз тӧро луыны курыса. Озьы «Путь Ильича» колхозэн Валериан Никитин 17 ар ӵоже туж секыт выльдӥськон вакытъёсы кивалтӥз.

Шаерысьтымы тросэз хозяйствоос та вакытэ тус-тас каремын вал, нош Валерьян Никитинлэнэз рос-прос ужаз, уждун но дыраз тыриськиз. 1993-тӥ арын доразы вуылӥз Россилэн президентэз Борис Ельцин. Нош 1994-тӥ арын «Путь Ильича» Удмурт Элькунлэн Данъян пул вылаз вал ни.

Республикаямы нырысьёсыз пӧлын «Путь Ильича» переработкаен вырыны кутскиз, сюро таза пудо вордонъя племзавод кариськиз. Доразы ӵемысь вуылӥзы Нижний Новгородысь, Санкт-Петербургысь, Ижысь гурт удысъя институтъёсысь тодосчиос. Ачиз но Валерьян Арсентьевич тодон-валанзэ будэтӥз, экономика наукаосъя кандидат, Россиысь Естествознаниея академилэн профессорез луиз. Ижысь гурт хозяйствоя академиын егит специалистъёсты дышетӥз на. Со сяна, трос аръёс ӵоже калык сое райсоветэ депутатэ бырйылӥз, огвакытэ Кун Кенешлэн но депутатэз вал.

Валериан Арсентьевичлэн кичӧлтэмезъя шаерамы гурт хозяйстволы сӥзем экономической союз кылдытэмын вал. Отын гуртоосты сюлмаськытӥсь ужпумъёс сэрттӥськизы.

1990-тӥ аръёсысен Валерьян Арсентьевич удмурт движение пыриськыны кутске. Кун Кенешысь депутат дыръяз туж сюлмаське кун кылъёс сярысь законэз кутон ласянь, Кун Кенешысь ик депутатэн, бӧрысь «Удмурт Кенешлэн» тӧроеныз Валентин Тубыловен ӵош соос депутатъёс пӧлын валэктон уж нуо, ялан ужась комиссиосын пумиськонъёс ортчытъяло, законлэсь кулэлыксэ валэктыны тыршо.

Огвакытэ Валериан Никитин «Удмурт Кенеш» огазеяськонлэн Дэри ёросысь ёзэныз кивалтӥз, собере «Удмурт Кенешлэн» вице-президентэз вал.

Та тып-тып, йӧно удмурт воргорон, огласянь, туж лякыт но калыкез шугъяськытӥсь ужпумъёсты сэрттыку, туж юн, зэмлыко, кытӥяз лек но луыны быгатэ. «Сямыз кӧльы» шуо со сярысь.

Туннэ но Валерьян Никитин удмурт движенилэсь уг палэнскы, «Удмурт Кенеш» огазеяськонлэн ревизонной комиссиеныз кивалтэ, Дэри ёросысь «Удмурт Кенешлэн» президиумезлэн ёзчиез луэ. Солы оско, солэсь визь-кенеш юало. Тодон-валанъёсыз гурт удысын но туж кулэ луо на, Валерьян Арсентьевич Дэри ёрос администрациысь гурт удысъя управлениен кивалтэ. Ваньмон дыръяз вутске книгаос гожъяны. Кылсярысь, Г. Перевощиковен ӵош соос ас вакытаз Якшур музъемлы сӥзем бадӟым книга поттӥзы.

Валерьян Арсентьевич — зэмос удмурт воргорон. Соин ужаны туж капчи, ваньзэ дыртытэк, рос-прос лэсьтоз, азьланяз ужаны кужым сётоз, — пусъе «Удмурт Кенеш» огазеяськонлэн Дэри ёросысь ёзэныз кивалтӥсь Лидия Биянова, — ёрос администрациямы ужаны берытскем дырысеныз, 6 ар ӵоже, ёросысь гурт удысъя одиг хозяйство но ӧз быры. «Удмурт Кенешлы» но ялан юрттӥське. Т. Борисовлэсь премизэ сётыны чакламын шуыса ми аслыз Валерьян Арсентьевичлы ум вераське вал ай, но со радиоысь тодэм ни. Туж, пе, пайми но уйзэ, пе, кӧлэме ӧз ни луы: мар вералом, кыӵе кылъёс шедьтом? Быдэс улонзэ син азяз пуктэм, тодаз ваем колхозын ужаны кутскемзэ но, политикае, удмурт движение пыриськемзэ но.

— Мон понна та туж выли дунъет, — востэмак шуэ ачиз Валерьян Арсентьевич, — бадӟым тау Якшурысь калыкелы, «Путь Ильича» хозайстволы, Дэри ёросэлы, «Удмурт Кенешлы» но удмурт калыклы. Таӵе туж вылӥ пусйизы бере, озьыен, ӵуказе эшшо ӟечгес ужано.

https://udmdunne.ru/2018/11/%D3%B5ukaze-ehshsho-%D3%9Fechges-uzhano/

 

 

 

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий