Туала Удмуртиын Исламлэн интыез

    «Ислам в Удмуртии» семинар арлы быдэ ортче Элькун Торолэн кивалтэтэз кичӧлтэм улсын. Туэ нырысьсэ со кивалтэтлэн юртаз оз ортчы — мечетьын. Тросэз лыктэмъёс нырысьсэ тодматскизы ислам осконэн.

    Мусульман огазеяськонъёслэн но обществолэн кусыпъёссы сярысь вераськон азьланьтӥськиз котырес ӝӧк сьӧрын. Кызьы пусйиз элькунысь муфтий Фаиз-хазрат Мухамедшин, Исламлэсь куронъёссэ чаклам трос гинэ шуг-секытъёсысь потыны юрттэ адямиослы. Ӵемысь мечете лыкто семья кусыпъёссы, ас сюлмаськонъёссы сярысь вераськыны. Соин ик туж кулэ мечетьёсын нимысьтыз урокъёс, кружокъёс, воскресной школаос, пумиськылонъёс ортчытъяны. Тросэз мусульман егитъёс «кырыж» сюрес вылэ Ислам сярысь тырмыт тодымтэенызы султо.

    Можгаысь мечетьын инвалид нылпиосты пыд йылазы султыны юрттонъя кабинет усьтэмын. Со сярысь вераз карысь имам Абдурашид-хазрат Газизулин. Нылпиосын ужало мусульманъёс сяна, сӧсыр нылпиосты будэтӥсь анай-атайёс но.

    Кестым мечетьысь имам, Удмуртиысь уйпал ёросъёсысь мухтасиб Ильмир-хазрат Касимов мечетьын экскурсиослэн кулэлыксы сярысь вераз. Кылсярысь, умой луысал школаын «Основы религиозных культур» тодметъя урокъёс мечетьёсын но ортчылысалзы ке.