Туала репертуарысьтыз тужгес яркыт ужъёссэ возьматоз Удмуртиысь йӧскалык театр Карелиысь учкисьёслы

    Туала репертуарысьтыз тужгес яркыт ужъёссэ возьматоз удмуртиысь йӧскалык театр карелиысь учкисьёслы 1

    Петрозаводскын, Карелиысь йӧскалык театрлэн сцена вылаз, удмурт артистъёс куинь спектакльзэс возьматозы — «Алые паруса», «Эрико яратон» но «Конек-Горбунок».

    «Берло аръёсы гастрольёсы ӵем потан Йӧскалык театрез азинтонын бадӟым инты басьтӥз. Элькунлэн палэназ вуылыса, коллектив выль учкисьёсын тодматске, аслэсьтыз быгатонлыкъёссэ но будэтэ шуыны луоз. Одӥг ласянь со сокем капчи ӧвӧл, мукет ласянь — будыны луонлык: выль площадкаос, выль ужъюлтошъёс, ужан амалъёс сярысь вераськыны но мае ке асэстыны луонлыкъёс», — вера Удмуртиысь йӧскалык театрысь литературая ёзэтлэн кивалтӥсез Наталия Панфилова.

    Солэн кылъёсызъя, гастрольёс улосвылъёсысь репертуарной театръёсын валче ужаны, лулчеберетъя но творчествоя кусыпъёсты юнматыны юртто. Удмуртиысь театр вошъяськон гастрольёсы азьланяз но пыриськыны малпа.

    Карелиысь йӧскалык театр Ижкарын 27–29 куарусёнэ ужалоз. Удмуртиысь учкисьёслы со «Лемби», «Венецианские близнецы» но «Корона Тролля» спектакльёссэ возьматоз.

    Тодэ вайытом, куартолэзе Удмурт йӧскалык театрысь артистъёс гастрольёсын Сыктывкаре ветлӥзы. Нош оштолэзе Ижкаре Коми Элькунысь крезьгуръя но драмая йӧскалык театр вуылӥз. 2017-тӥ арын Удмуртиысь театрлэн Марий Элысь но Коми-Пермяк округысь театръёсын вошъяськон гастрольёсыз ортчизы.

    Гастрольёс Россиысь лулчеберетъя министерстволэн но Гастрольёслы юрттэт сётонъя федерал центрлэн «Большие гастроли — 2018» федерал ӵектоссы улсын радъясько.

    https://udmurt.media/udm/news/kultura-i-turizm/37690/