Туала балет, вашкала удмурт гур
Фестиваль Удмуртиын 62-тӥзэ ортче. Туэ со усьтӥськиз 13-тӥ оштолэзе Воткаысь «Юбилейный» культурая дворецын Санкт-Петербургысь кун академической капеллалэн концертэныз. Нош Екатеринбургысь эктӥсь труппа П. Чайковскийлы сӥзем фестивале 2-тӥзэ пыриськиз: Ижкаре соос вуылӥзы ини 2017-тӥ арын. Туэ эксцентрик-балет 2 постановка возьматӥз: «Чусовская тетрадь» но «Собрание сочинений».
С. Смирнов верамъя, «Чусовская тетрадь» постановка та дырозь огпол гинэ Сочиын возьматэмын вал. Эктон бордын али но ужало на. Но С. Смирновлэн сое Удмуртиысь калыклы возьматэмез потӥз, угось отын удмурт кырӟан чузъяське.
«Асьмеос, Урал палан улӥсь калыкъёс: ӟучъёс, бигеръёс, удмуртъёс но мукетъёсыз — ваньмы одӥг пуртыын пӧзиськом, — вера С. Смирнов. — Асьмемыз огазеясь культура матын, туж матын луэ. Удмуртилэн лымшорысьтыз ми шедьтӥм туж тунсыко кырӟась Глафира нимо песянаез. Мон но, крезьгур понна кыл кутӥсьмы но солэн куараезлы синмаським. Вашкала кырӟанэзлэн пуштросэз но туж мур: улон шур, гумыр, ӝог ортчись егит дыр сярысь. Нош Чусовая шур — со асьме палась Волга».
«Чусовская тетрадь» — зэмос спектакль. Эктӥсьёслэн мугоръёссы, тыл, вужеръёс но крезьгур пӧрмо йӧспӧрэм кыллы. Со кылын С. Смирновлэн эксцентрик-балетэз вера бадӟым кунмылэсь историзэ, возьматэ ӟуч литератураысь «пичи адямиез». Кунмылэн историысьтыз секыт вакытъёс — война, сютэм аръёс, репрессиос — котькуд адямиез вӧсь каризы. Но нимаз адямилэн вал на аслаз адӟонэз, кайгуэз, шудэз. Озьы ке но ваньмыз ортче. Ваньзэ тае эктӥсьёс быгатыса возьматӥзы дырекъясь чиньыосынызы, зуркыт выремъёсынызы, чигиськись кадь мугоръёсынызы.