Трокай Борисов нимо йӧскалык премиен данъянэз выльдозы Удмуртиын

«Удмурт Кенеш» огазеяськонлэн кылкутӥсь секретарез Елена Александрова верамъя нырысь ик куинь адямилы сётъяло вал, со Альберт Разин дыръя кутскемын вал, азьло вашкала дыръёсы со кылдытэмын вылэм. Но ку сое сётъяло вал, кызьы ке но сое тодоно ӧй вал. Радлыкез-а, мар-а валамон ӧй вал. Собере «Дэменлэн» но али берло аръёсы уг кылӥськы ужамез но, соин ик «Удмурт Кенеш» сое ас вылаз басьтӥз.

Елена Александровалэн кылъёсызъя, выльдэм данъетэн арлы быдэ одӥг муртэ пусъёзы. Сое «Удмурт Кенешлэн» йӧскалык премиосъя ӧриез быръёз. Коньдонкузьымлэн быдӟалаез 25 сюрс манет юнматэмын. Вис карем бере нырысетӥ премиез туэ Трокай Борисовлэн вордскем нуналэзлы сӥзем ужрадын толсуре сётозы.

«Одно со луоз (Трокай Борисовлэн — ред.) вордӥськем нуналэзлы сӥземын. Чакламын луоз, кунлык котырын ӟеч вырись адямиос. Чаклалозы, кин трос кужымзэ понэмын удмуртлыкъя, кунлыкъя (уже — ред.)», — Елена Александрова пусйиз.

Тодэ вайытом, 15-тӥ южтолэзе ик «Удмурт Кенеш» огазеяськонлэн исполкомез Ашальчи Оки нимо премилэсь лауреатъёссэ юнматӥз. Туэ со Йӧскалык театрын литературая ёзэтэн трос ар ӵоже кивалтэм Анна Евсеева но Удмурт кун университетысь дышетӥсь, кылосбур тодосъя кандидат Галина Шушакова. Соосты сӥё-дано пусъён 4-тӥ оштолэзе Гракын радъяськись «Ашальчи лыдӟонъёсын» ортчоз.

Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/obshchestvo/33501/