Тодосчиослэн юртазы финн-угор лулчеберетлы сӥзем праздник ортчиз
Россиысь котькуд улосъёсын, кытын уло финн-угор выжыысь калыкъёс, та нуналэ радъясько пӧртэм ужрадъёс. Культурая ужъюртъёсын сяна, туэ нырысьсэ та нуналлы сӥзем праздник Ижкарысьтымы Тодосчиослэн юртазы но ортчиз.
Ужрадэз усьтӥз Удмуртиысь наука удысысь дано ужась, профессов Иван Рысин. Пумиськонлэн азькылаз географи тодосъя доктор пусйиз, котькыӵе иськемъёс мед люкозы финн-угор выжыысь калыкъёсты, соосты котьку огазеялоз лулчеберет шоры учконъёссы.
Тодосчиослэн юртазы финн-угор лулчеберетлы сӥзем праздникын валтӥсь инты басьтӥзы асьме выжы калыкъёслэн историзылы, сям-йылолъёссылы, вашкала дӥсез улӟытонлы сӥзем вераськонъёс. Макем кема утиськозы дауръёсын калыкен кельтэм тодонъёс — адзонъёс, сокем узыр но кужмо луоз азьланез.
«Удмурт лулчеберет туннэ гуртъёсын улэ, — шуэ Элькунысь культурая но туризмъя министр Владимир Соловьёв. — Сое нуисьёслы, утисьёслы капчигес мед луоз шуыса, шуом, дӥсь вурыны, инструментъёс басьтыны, фестиваль-концертъёсы потаны, Элькун Кивалтэт юрттэмен туэ 16 ёросъёсы автобусъёс вуозы, 6 миллион пала уксё висъяське костюмъёслы но мукет кулэ луись арбериослы. Удмуртиын портэм выжы калыкъёс уло, — азьланьтэ министр, -асьмеос дышим ини ог-огмылэн концертъёсамы, ужрадъёсамы ветлыны. Кырӟан, эктон, сям-йылолъёс пыр со герӟетъёс кужмогес, юнгес луо».