Тодмо луизы 2017-тӥ ар понна Кузебай Герд нимо премилэн лауреатъёсыз

Йӧскалык премиосъя ӧрие туэ 5 кандидатура вуиз.

«Шодӥське, ёросъёс ужало шуыса, — вера «Удмурт кенеш» огазеяськонлэн  йӧскалык премиосъя ӧрилэн кивалтӥсез Георгий Грязев. — Вань дано адямиос, кудъёссэ пусйыны кулэ, нош мукет ласянь, вуизы сыӵе кандидатураос, кудъёсызлы коть туннэ ик, витьназылы ик, сёт со премиез.  Соос сыӵе дано адямиос, кудъёсыз сомында лэсьтӥзы удмурт калык понна, Удмурт Республика понна».

5 пӧлысь комиссия кык тужгес но устоосэ бырйиз.  Со нимъёслы ик премия сётыны дурбасьтӥзы  исполкомлэн ёзчиосыз но.

Вениамин Ившин — тодмо нылпи кылбурчи, Удмурт Элькунысь но Россиысь Гожъяськисьёслэн огазеяськонъёссылэн ёзчиез, книга поттонъя «Удмуртия» издательстволэн азьвыл валтӥсь редакторез.

Нош Надежда Пахомова — Кияса ёросысь Уддяди гуртысь Росси Федерациысь калык творчествоя дано «Инвожо» коллективлэн кивалтӥсез.

Лауреатъёсыз данъян ужрад ортчоз Вавожын Герд лыдӟонъёс дыръя 15-тӥ тулыспалэ.

Тодады вайытом, кылем арын Кузебай Герд нимо премилэн лауреатъёсыз луизы Пичи Пургаысь удмурт дӥсез улӟытӥсьёс Татьяна но Василий Москвинъёс, Можга карысь крезьгурчи, «Марӟан» ансамбльлэн кивалтӥсез Вячеслав Кудрявцев, Эстониысь гожъясь, удмурт литератураез эстон кылэ берыктӥсь Арво Валтон.

http://www.myudm.ru/