Терроризмлы пумитъяськон сярысь вераськиз Александр Бречалов егитъёсын но йӧскалык огазеяськонъёслэн азьветлӥсьёсынызы
Улосвыл кивалтӥсь егитъёсын ужан амалъёсты воштыны кулэ шуыса пусйиз, угось ӵапак егитъёсты вербовщикъёс ӵемгес синйылто.
Терроризмлы пумит ужан амалъёс сярысь вераськиз элькунысь Егитъёслэн лулчеберетъя йӧскалык огазеяськонъёссылэн «Вместе» ассоциацизылэн кивалтӥсез Мария Царёва.
2020-тӥ арын Удмуртилэн кунлыкезлы 100 ар тырмонэз пусъёнлы дасяськон сярысь вераськыку Александр Бречалов ивортӥз, 7-тӥ куарусёнэ та ужпумъя ужась группалэн кенешонэз ортчоз шуыса, отын юбилейлы нырысь ик быдэстоно валтӥсь объектъёсты но ужрадъёсты пусъёзы.
Элькун тӧролэсь ужзэ огдырлы быдэсъясь улосвылын этногурт кылдытонлы но саклык висъяз. Со шуиз:
«Этногуртлэн вуоноез тӥ бордысь гинэ потэ. Со калык ӵектос. Тӥ вералоды, кызьы сое быдэстоно. Ойдолэ ӵош малпаськомы»
Удмуртиысь йӧскалык политикая министрлэсь ужзэ быдэсъясь Лариса Буранова верамъя, ӵектосэз быдэстон понна кӧня ке интыос ӵектэмын: «Лудорвай» музей, «Байкал» бизнес-центр сьӧрысь участок но зоопарк вӧзысь интывыл. Со сяна, этногуртэз но экспоцентрез валчеясь огъет кылдытыны ӵектон но вань.
Егитъёсты сюлмаськытӥсь куд-ог ужпумъёсты пумиськон дыръя ик сэрттыны-пертчыны луиз. Кылсярысь, Удмуртиысь таджикъёслэн лулчеберетъя йӧскалык огазеяськонзы Можгаысь коллективлы йӧскалык дӥськутъёс басьтыны юрттыны дась луэмез сярысь вераз.