«Телеграмын» удмурт кылын Wordle шудон кылдӥз
Англи кылын Wordle шудонэз 2021-тӥ арлэн пумаз малпаз Нью-Йоркысь Джош Уордл программист. Ог 3 толэзь ортчыса, Wordle-ен 2 миллионлэсь ятыр адями шудэ вал ини.
Кроссвордлы укшась шудон туж капчи: нуналлы быдэ вань шудӥсьёс 5 буквалэсь огкадь кылэз тодыны тыршо. Сётэм кылэз тодыны луэ, мукет кылъёсты шудонэ гожъяса. Котькуд гожтэм кылын букваос пӧртэм буёлъёсын пусйисько: соосъя валаны луэ, кыӵе букваос сётэм кылын вань.
Толшорысен та шудонэн удмурт кылын но шудыны луэ, «Телеграм» мессенджерысь «УдмуртWordle» ботэ пырыса (t.me/UdmurtWordleBot). Шудонэн калыкез тодматӥз «Кенеш» журналлэн валтӥсь редакторез Анастасия Шумилова.
— Кылем арысен мон Telegram-ын «О чём поёт вотячка» блог нуисько, отын удмурт литература сярысь ӟуч кылын гожъясько, — вера Анастасия. — Блогме Россиысь ӧжыт лыдъем мукет калыкъёсын тунсыкъяськисьёс но лыдӟо. Огпол блоглэн чатаз Эльдар бигер программист гожтӥз: со Wordle выллем шудон бигер кылын кылдытэм, ӵектӥз шудонэз удмурт кылын но лэсьтыны.
Анастасия Эльдарен герӟаськем но, ӵошен соос «УдмуртWordle» шудон-бот пӧрмытӥллям. Бигер юрттӥськисьлэн та шудонлы кодэз гожтэмын вал ини. Нош удмурт кылэз визьмо бот «дышетӥз» «Удмурт йӧскалык кылшыкыс» вотэс бамлы луыса