Театрлэн арез улсын «Удмуртия театральная» элькун фестиваль ортчоз
Азьвыл фестиваль южтолэзе ортчылэ но «Театральная весна в Удмуртии» нимаське вал. Театрлэн арез улсын ужрадлэн пуштросэз кӧня ке воштӥськиз: туэ со вожвылъяськон уз луы, но пӧртэм ӧръёсъя данъетъёс сётозы ик.
«Удмуртия театральная» элькун фестиваль улсын чаклам возьматонъёс:
— 6-тӥ коньывуонэ Удмуртиысь операя но балетъя кун театрын «Юнона и авось» рок-операез (16+) учкыны луоз;
— 8-тӥ коньывуонэ «Молодой человек» театрын А. Чеховлэн веросэзъя «Огни» спектакль (16+) возьматозы;
— 9-тӥ коньывуонэ Драмая ӟуч театрын И. Ильфлэн но Е. Петровлэн романзыя «12 стульев» авантюра (16+) пуктозы;
— 10-тӥ коньывуонэ Удмуртиысь мунё театр учкисьёссэ Ульрих Хублэн пьесаезъя «У ковчега в восемь» спектакле (12+) ӧте;
— 11-тӥ коньывуонэ Сарапулысь драмая театрын «Под знаком саламандры» фантастика историез (12+) адӟыны луоз;
— 12-тӥ коньывуонэ Удмуртиысь йӧскалык театр «Васьлей» кык ёзо комедиез (18+) возьматозы;
— 13-тӥ коньывуонэ Глазкарысь «Парафраз» театр Гильерме Фигейредолэн пьесаезъя пуктэм «Сейчас не до любви» спектакленыз (16+) тодматоз.
Фестивальлы йылпумъянъёс лэсьтозы но призёръёсты пусъёзы толсуре Театрлэсь арзэ ворсан ужрадын.
Ватсалом, 30-тӥ куарусёнэ Мунё театрын «Моно-лир» вожвылъяськонлэн нырысетӥ люкетэз ортчиз. Отын Удмуртиысь драмая театръёсысь артистъёс кырӟаны быгатэмзэс возьматӥзы. Кыкетӥ люкетэз – лыдӟиськон – 25-тӥ шуркынмонэ ортчоз.