«Театр но нылпиос» Росси фестивале Удмуртиысь 6 коллектив пыриськоз
Фестивалез сӥё-дано усьтон ужрад 12-тӥ куартолэзе 17 часын Шор площадьын ортчоз. Солэсь азьвыл, 16 часын, пинал артистъёс, коллективъёслэн кивалтӥсьёссы, куноос но радъясьёс Ялан ӝуась тыл доры сяськаос понозы.
«Театр но нылпиос» фестивале 13 коллективъёс пыриськозы — Удмуртиысь, Чувашиысь, Марий Элысь, Татарстанысь, Башкортостанысь, Ярославль, Архангельск но Ростов улосвылъёсысь 200 пала пинал артистъёс. Соос удмурт, бигер, башкир, украин но ӟуч кылын спектакльёсты возьматозы.
Удмуртиез возьматозы Брангуртысь пиналъёслэн «Кузьыликар» театрзы, Ижкарысь «Птица» но «Дай пять!» коллективъёс, бигер крезьгуръя, кырӟанъя но эктонъя «Асылъяр» ансамбль, балетъя «Радуга» нылпи театр но удмурт егитъёслэн «Ватка» этностудизы. Соос фестивальлэн улосвыл люкетаз пыриськем 50 коллективъёс пӧлысь бырйемын.
Фестиваль улсын возьматонъёсты кутскоз «Ватка» этностудия. Удмуртиысь Йӧскалык театрлэн сцена вылаз егитъёс Лариса Ореховалэн кылбуръёсызъя пуктэм «Ярдуртэм нюлэс» спектаклез шудозы.
«Театр но нылпиос» фестиваль ас мылкыдзыя шудӥсь йӧскалык театръёсты ӝутон понна радъяське. Ужанрадлыказ конкурс улсын возьматонъёс, творческой пумиськонъёс, мастер-классъёс чакламын.