Таула егит пиос ярато куиськыны

    "Финноугория" фестивальын куиськонъя мастер-классын 30-лэсь ятыр студентъё тодон-валан люказы.

    «Пӧлазы тросгес вал пиос, – паймемзэ вера Якшур-Бӧдья ёросысь кибашлыослэн юртысьтызы куиськись Екатерина Виноградова. – Тунсыко соиз, пиослэн куиськыны пуксемзы потэ. Нылъёс учкыса сыло, нош пиос станок сьӧры пуксё. Ми доры Москваысь студентъёс-пиос ветлӥзы вал. Сыӵе соолы куиськон уж кельшиз. Одӥгез 4 час куспын быдэс орнамент-пужы куиз».

    "Финноугория" фестивале лыктэм котькудиз студент ачизъя киуж бырйыны быгатӥз. Куиськизы, горд сюен но кызьпу туен выризы, куроен, пуэн эскертӥзы, пужъятӥськизы но чырты весь лэсьтӥзы. Киужъёслы дышетӥзы Якшур-Бӧдья ёросысь кибашлыослэн юртысьтызы усточиос.