Татьяна Ишматова: Удмуртилэн 100 аръем юбилеез улосчиосмы понна бадӟым исторической но культурной ужрад луыны кулэ

Удмурт Элькунлэн Кун Кенешезлэн Президиумаз чузъяськем “Удмуртилэн кунлыкезлы 100 ар тырмонэзлы сӥзем ужрадъёсты улонэ пыӵатонъя план” сярысь вера “Удмурт кенеш” огазеяськонлэн Тӧроез Татьяна Ишматова

2020-тӥ арын Удмуртилэн кунлыкезлы 100 ар тырме. Сю аръем котырес лыдпусэз пусъён – бадӟым, кема кыстӥськись уж. Со удмуртъёслэсь но быдэс регионлэсь историзэ пыр-поч валан бордын ужан процесс луэ. Асьмелы одно ик тодамы возёно, автономной республика кылдытон бордын ужась муртъёсмес. Соос вань кужымзэс но визьзэс поныса асьме понна тыршизы: Максим Прокопьев, Трофим Борисов, Иосиф Наговицын, Константин Яковлев, Кузёбай Герд…. Республикалэн пыд йылаз султон сюресэз капчи ӧй вал. Та вакыт трос адями быриз, политической репрессиос ортчылӥзы. Удмурт автономилэн кылдонэз социально-экономической азинскон но калыклэн лулчеберетэз, духовной улонэз воштӥськон улсын юнмаз. Удмуртиысь политической ужпумъёсты 90-тӥ аръёс мукет ӧре выжтӥзы… Сю ар куспын асьмеос секыт сюремзэс ортчимы. Но асьме калыклэн тыршемез понна, Удмуртия бадӟым вамышъёс лэсьтыны быгатӥз. Одно ик верано, асьме вормонъёсмы йӧскалык кусыпъёсты, оскон кусыпъёсты утён бордысен пото.

Жаляса верано, асьме элькунамы тросэз улӥсьёслэн туала Удмуртилэн кылдэмез сярысь тодон-валанзы ӧвӧл. Соин ик, ӵемгес но тросгес верано та сярысь, ортчем историез валано, солы дунъет сётоно, элькунмылэсь азьлань улонзэ малпано, туалазэ но ортчемзэ ӵошатоно. Удмуртилэн сю аръем юбилеез асьме элькунамы улӥсь калык понна бадӟым исторической но культурной ужрад луыны кулэ.

Элькунамы нимысьтыз оргкомитет кылдытэмын, кунлык басьтонлэсь 100 арзэ пусъён ужрадъёсын план малпамын. Удмурт Элькунлэн Кун Кенешезлэн пумиськоназ “Удмуртилэн кунлыкезлы 100 ар тырмонэзлы сӥзем ужрадъёсты улонэ пыӵатонъя план” сярысь вераськимы. Удмурт Элькунысь Йӧскалык политикая министрлэсь веранзэ кылзӥськимы, кызьы пандемия вакытэ ужрадъёсын План улонэ пыӵа.

Дом Дружбы народов
Добавить комментарий