Татьяна Ишматова: туала вакытлы тупамон ужпумъёсмы мед луозы шуыса, асьмеос дышетскыны тыршиськом
Пусъем дырлы быдэстыны быгатымон ужпум пуктыны дышетскон, ужлэсь юн палзэ но тырмымтэосты пусъён, луонлыкъёсты но кышкытлыкъёсты валан — со валтӥсез, мае туннэ ас понназ валаны кулэ котькуд азьветлӥсь, пусйиз «Удмурт Кенеш» огазеяськонлэн тӧроез Татьяна Ишматова.
«Асьмеос кулэ валаны, кыӵе ляб интыосмы, кыӵе зол интыосмы вань, марлэсь кышканы кулэ, дась луыны кулэ марлы. Со дыре ик учкыны на ай, оло, асьмеос куддыръя ум но валаське, сюбег учкиськом, нош ӵош кариськыса, мар асьмелэн вань на ай, кыӵе выль амалъёсты кутыны луэ, кыӵе азинлыко ужъёсмы быгато луыны», — шуэ Татьяна Ишматова, «Удмурт Кенеш» огазеяськонлэн тӧроез.
Дышетон-кенешонэ люкаськемъёс, группаослы люкаськыса, асьсэ ужамзэс сэрттӥзы-пертчизы. Умоез пӧлын тросэз пусйизы интыосысь кивалтӥсьёсын ӟеч кусыпъёссэс, волонтёръёсын ужамзэс.
Пуктэм ужпумъёсты быдэстонын ляб интыос пӧлын нырысь ик коньдон тырымтэез веразы. Ӵемысь ужрадъёсты ортчытыны но интыысь коньдэтъёсын уксё чакламтэ. Озьы ик каръёсысь но ёросъёсысь ёзэтъёслэн нимысьтыз ужан интызы ӧвӧл. Кыӵе ке но ужъюртын нимаз, шуом, кабинетсы луысал ке, калык тодысал, кытчы вазиськыны юанъёсын яке ӵектонъёсын. Со сяна, тырмымтэос пӧлын пусйизы ивор вӧлмытон уж рос-прос пуктымтэ шуыса, ужез возьматыны но быгатон кулэ.
Озьы ик ваньзы сямен веразы удмуртъёслэсь мылкыдтэм луэмзэс. Ужрадъёсты ортчытонэ, нош ӵемысь ужрадъёсы пыриськисьёсты но шедьытыны секыт луэ.
Лэчыт ужпумъёсты сэрттон-пертчон, ужез кулэ ӧре валтон понна куд-ог дыръя тодонлык уг тырмы. Соин ик таӵе дышетскон-кенешонъёс туж кулэ, пусйиз Татьяна Ишматова.
«Асьмелы пӧртэм площадкаосы потаны кулэ, кытын дышето, не только «Удмурт Кенеш» пушкын. Асьмеос но будыны кулэ, компетенциосмы кӧня ке мукет луыны кулэ ни, соин ик туала вакытлы тупамон ужпумъёсмы мед луозы шуыса, асьмеос дышетскыны тыршиськом», — вера Татьяна Ишматова, «Удмурт Кенеш» огазеяськонлэн тӧроез.