Татарстанын «Гырон быдтон» шулдыръяськон но «БиГерд» форум ортчизы

Пусйымон радъямын вал нылкышнолэн чеберезлы сӥзем «Чеберина» но воргорон кужымлы сӥзем «Батыр» вожвылъяськонъёс.

Праздник улсын ик пумиськонъёс ортчизы. Тӧршорын пукизы кырӟась Николай Анисимов, «Анай» фильмез пуктӥсь режиссёр Денис Корнилов но Франциысь профессор Ева Тулуз.

«Гырон быдтонэн» ӵош Енабердино черкогуртын ик ортчиз егитъёслэн «БиГерд» улосвылкуспо форумзы.

Ужрад удмурт егитъёсты анай кылэз, калыклэсь сям-йылолъёссэ утён, азинтон, калык кусыпъёсты гажан ӧре кыскон вылысь ортчытӥське. Озьы ик  егитъёс пӧлын азьветлӥсьёсты шараян но азьпалан ужбергатисьёсын, мер ужасьёсын, кивалтӥсьёсын ӵош ужан вылысь кусыпъёсты кылдытон понна.

Форум улсын флешмоб ортчытэмын вал. Отчы пыриськизы удмурт дӥськутэн егитъёс. Соос вашкала удмурт эктонъёсты туала сямен быдэстӥзы. Чакланъёсъя, туэ флешмоб уката но трос адямиез кыскыны быгатӥз. Оглом отчы пыриськизы 200-лэсь трос адямиос.

Форумын 3 площадкаос ужазы – этноблоггинг, этноквест но фольклорлы сӥзем площадка.

Этноквестын  Коркакузё но Вумурт люкаськемъёслэсь удмурт калык йылолъёсты тодэмзэс эскеризы.