«Татар Кызы» вожвылъяськонлы дасяськон азьланьтӥське

3 толэзь ӵоже ини нылашъёсын пӧртэм ӧнерчиос ужало. Соос чебер ветлыны, туспуктӥсен ужаны дышето. Со сяна егитъёс бигер кылзэс волято, эктыны, кырӟаны быгатонлыкъёссэс паськытато, ас калык сям-йылолъёсын матэгес тодматско.

Та дыр куспын нылъёс пӧртэм фотосессиос пыр потӥзы ни. Берпуметӥез 25-тӥ тулыспалэ Ижкарысь Йо дворецын ортчиз. Нырысь нылъёс бигер егитъёслэн «Иман» командазы понна мини-футболын «висизы», собере, конькиос вылэ султыса, туспуктӥсь азьын ветлӥзы.

Нош та нуналъёсы конкурсэ пыриськись нылъёс кибашлы луэмзэс пусъён бордын тыршо. Соос бигер дӥсьлэсь тужгес но валтӥсь люкетъёссэ быдэсто: бигер калык пужыосъя гадь вылын нулдоно изю пужъято. Со луыны быгатэ чибориё синьысъёсын, инӟыосын, бисерен.

«Вашкала аръёсы изюез нылкышноос дӥсь улын нулдылӥзы, — шуэ журналист Фанзиля Салихова. — Бӧрысьгес ини сое чеберъяськон арбери шуыса чыртыязы керттылыны кутскизы. Сое бадӟым шулдыръяськонъёсы дӥсяллязы. Кема аръёслы изю вунэмын вал. Берло дыре сое нылашъёс выльысь нулдыны кутскизы. Лавкосын со уг вузаськы. Нылкышноос сое асьсэ киосынызы быдэсто».

Нош калфак, бигер нылмуртлэн такъяез, паськыт вӧлмемын. Конкурсэ пыриськисьёс сое ас малпам пужызыя быдэсто.

«Татар Кызы» элькун вожвылъяськонын нимысьтыз дефиле ортчоз. Отын нылъёс ас киынызы быдэстэм ужъёссэс дунъясьёслы но учкисьёслы возьматозы.