Сюмси ёросысь «Удмурт нылкышно кенешлэн» ёзчиосыз элькун ужрадъёсы рос-прос пырисько

Нылкышноослэн калыккуспо нуналзы азьын мер огазеяськонлэн кивалтӥсез Раиса Волкова ужамзы но сюлмаськонъёссы сярысь вераз. Солэн кылъёсызъя, нылкышно кенешчиос туж шаплыесь, котьмар карыны быгатӥсесь но калыкез бурдъясесь.

«Удмурт дунне» газет ялӥз вал «Гурт адями» конкурс. Отын ми ужамы туж умой, «Выжызэ утись» номинациын Тукан гуртысь Евдокия Михайловна Ильиных понна сомында куара бичам. Сюмсиос пуктӥзы рекорд, шуизы. Со вожвылъяськон кемалась ортче ни, ноку но сомында куара бичамын ӧй вал. 2 сюрс 304 куара ми бичамы», – пусйиз Раиса Волкова.

Вормонъёс но шумпотонъёс сяна, огазеяськон азьын шуг-секытъёс но кылдо. Котькытын кадь ик, тужгес но сюлэмшугъяськытӥсез соос пӧлысь — удмурт кылэз дышетон. Раиса Волкова верамъя, нылпи садъёсы лыктыса, пиналъёс анай кылзэс вунэто, малы ке шуоно ёросын удмурт визьнодасьёс уг тырмо.

Удмурт кылэз утьыны дышетсконниын но секытгес, шуэ Раиса Волкова. Со верамъя, школаосын ӟуч кылэз арнялы куать пол дышето, нош анай кылэз — одӥг пол гинэ. Сыӵе югдур быдэс элькунын, соин ик та ужпумез вырӟытытэк, ужрадъёсын гинэ удмурт кылэз азинтыны секытгес луоз, лыдъя огазеяськонлэн кивалтӥсез.

Озьы ке но, Сюмси ёросысь кенешчиос пиналъёс понна йӧскалык шулдыръяськонъёс радъяло. Кылсярысь, туэ покчи пиналъёслы «Пичи чеберайёс но батыръёс» вожвылъяськон ортчоз, нош школае ветлӥсьёс анай кылзэс волятыны Удмурт кыллэн арняосаз быгатозы, тодон-валанъёссэс удмурт кылъя олимпиадаын возьматозы. Озьы ик котькуд ар удмурт пиналъёслы йӧскалык ёлка ортче.

Ватсалом, «Удмурт нылкышно кенешлэн» Сюмси ёросысь ёзэтэз улсын «Табань» нылкышно клуб ужа. Со сяна, огазяськонлэн ёзчиосыз «Удмурт Кенешен» но «Шундыен» кусып возё.

Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/obshchestvo/33049/

Поделитесь с друзьями:

Журналист, редактор, контент-менеджер сайта, СММ специалист, оператор-постановщик интернет-телеканала "Даур ТВ"

Дом Дружбы народов
Добавить комментарий