Сюмси ёросысь Пӧбья возьёс дасясько Герберез пумитаны

Герберлэн режиссёрез Павел Поздеев малпамъя, Герберлэн программаез куиньлы люкиськоз: вӧсяськон, шулдыръяськон, гурт удысын азинлыко ужасьёсты пусъён. Валтӥсь сцена вадьсын 7 метръем писпуос ӝутскозы: тӧдьы кызьпу, горд пужым но сьӧд кыз.

Куноос понна 15 площадкаос чакламын. Тӧршорын» – шор сцена вылын – шулдыръяськонэз сӥе-дано усьтон, гурт возёсысь пусъён азьмынӥсьёсты фольклор коллективъёслэн концертсы ортчоз. Озьы ик валтӥсь сцена вылын «Нюлэс гур» площадка улсын Удмуртиысь но Россиысь улосвылъёсысь удмуртъёслэн профессиональной но самодеятельной коллективъёссы быгатонлыкъёссэс возьматозы. Ӝукез вӧсян ортчоз «Мудор» площадкаын». Удмуртиысь, Россиысь улосвылъёсысь делегациос но кунгож сьӧрысь куноос понна азбаръёс усьтӥськозы «Кунокуа» площадкаын. Кибашлыослэн карзы – чеберлыко киужъёсъя юртъёслэн ужъёсынызы адӟытон понна кыл кутоз «Усточикар» площадка, пӧртэм тӥрлыкъёсын но арбериосын, сиён-юонэн вузкарон понна — «Вузкаронни».

Удмурт музъем вылысь батыръёс кужымзэс возьматыны быгатозы «Батыр шудонъёс» площадкаын. Пиналъёс но быдэ вуымтэос понна сяме пыӵам калык шудонъёсты но спортъя ӵошатсконъёсты дася «Пичи Гербер» площадка. Кинлы ке эмъюрттэт кулэ луиз ке, вазиськыны быгатозы «Эмъяськонние. Эмъюм турынъёсын суро кызьпу веник керттыны мылкыд карисьёсты возьмалозы «Веник керттон» площадкаын.

Удмурт эктонъёслы дышетоз «Эктон возь», удмурт кырӟанъёсты быдэстозы «Кырӟан бусыын», Ӝытазе ваньзэсты возьмалоз «Шундэктон», кудзэ радъялоз удмурт егитъёслэн «Шунды» огазеяськонзы.