Сюан дэремъёсты возьматозы Эгра каргуртын

    Сюан дэремъёсты возьматозы эгра каргуртын 1

    Иворъёсъя «Удмуртия» агентстволы со сярысь вераз фестивалез радъясь, Эгра ёросысь Калыкъёслэн эшъяськон юртысьтызы калык дӥськутъя суредась-модельер Надежда Касаткина.

    «Та темая воксё уг верасько трос, уг но адскы калык сое нуллэ, дӥся шуыса. Егитъёс уг но тодо, кыӵе дӥськутэн кулэ потыны сюанэ. Калык культураез но ӝутыны кулэ шуыса сое малпамы лэсьтыны. Пичиен-пичиен, оло, малпалозы, егитъёс но вуриськыны кутскозы», — Надежда Касаткина.

    Фестивальын вашкала дӥськут но, вашкала инъет вылын туала костюмъёс но луозы. Нялтас вераса, выль дӥськут кылдытон понна пересьёсмылэсь удмурт сюан дэремзэс учкыны луоз, кылсярысь, Эграысь чеберлыко киужъёсъя центрын.

    Ачиз Надежда Касаткина нырысетӥ сюан коллекцизэ туала этномода ӧръя вурыны малпа, «егитъёс мед нуллозы шуыса». Солэн кылъёсызъя, быдэсак вашкала сямен вурем дӥськутэз тросэз али уз но дӥсялэ, нош солы укшатэм туала дэремъёсты нуллыны мылкыд карисьёс вань ни.

    Фестивале пыриськыны куриськонъёсты 31-тӥ коньывуонозь куто. Но радъясез верамъя, со дыр берлыгес но выжтэмын луыны быгатоз. Та дырлы куриськонъёс кыл вылын гина ай.

    «Калык малпа на, малы ке шуоно дӥськутсы вань возьматыны, но сюан дӥськутсы ӧвӧл, лэся. Али вуро, лэсьто. Кудымкаре жингыртӥ вал, отын Вера Мехоношина, со но шуиз, оло, лыкто, солэн вань сюан дӥськутэз, нош мукетъёсызлэн вурыны кулэ на», — вераз Надежда Касаткина.

    Солэн кылъёсызъя, фестиваль-вожвылъяськонэ одно пыриськозы шуыса веразы ни Пичи Пурга ёросысь куинь коллектив, Эгра ёросысь Чеберлыко киужъёсъя центрысь ӧнерчиос, Зураысь кибашлыос. Нош Яр ёросысь усточиос сюан йылол но дӥськутсэс возьматыны мылкыдзэс шараязы.

    Со сяна, фестиваль дыръя сюанын кулэ луись арбериосын вузкарон-адӟытон радъямын лоуз.

    Ватсалом, «Сюан дэрем: вашкалаысьтыз туалаез пала» нырысетӥез элькун фестиваль-вожвылъяськон Россиысь кун йӧскалык политикая стратегиез Удмуртиын быдэсъян но «Этносоциальное развитие и гармонизация межэтнических отношений» элькун программаез улонэ пыӵатон улсын радъяське. Ужрадэз кылдытӥсьёс но радъясьёс: Удмуртиысь Йӧскалык политикая министерство, Эгра ёрос администрациысь Лулчеберетъя но туризмъя управление но Эгра ёросысь Калыкъёслэн эшъяськон юртсы.

    Фото: Григорий Фомин

    ИА «Удмуртия»