Сыктывкарын чузъяськизы бесерман крезьёс

«Эпосы и мифы леса» фестивальлэн кыкетӥ тураз Удмуртилэсь данзэ утизы коллективъёс: Ижкарысь «Балаганчик» театр но Яр ёросысь Ворцы гуртысь «Бесерман крезь» фольклор ансамбль. Та проект Марий Элысь, Удмуртиысь, Коми-Пермяк, Ямало-Ненецк округъёсысь , Перм улосысь, Коми элькунысь тужгес но усто коллективъёсты люказ. Ваньзы соос нунал куспын шулдыртӥзы куноосты, кырӟазы, эктӥзы. Нош йылпумъяськиз фестиваль флэш-мобен , кудаз ке эктӥсьёс но учкисьёс ӵош керттӥзы одӥг бадӟым шобрет

«Бесерман крезь» ансамбльлэн кивалтӥсезлэн Екатерина Анатольевна Дюкиналэн верамезъя, фестиваль туж аспӧртэмлыко ортчиз. Ворцыос паймытӥзы учкисьёсты «Ӟазег сюан» йылолэз возьматэменызы. Ачиз Екатерина Анатольевна тужгес синмаськиз Ямало-Ненецк округысь Валентин Вельяловлы — со куинь аресъем пиеныз ӵош калык кырзанъёсты быдэстӥз.

Фестивале коллективысь 10 адями пыриськиз. Бадӟым сцена вылэ сяна, соос Арлыдоослэн улон юртазы но концертэн вуттӥськизы на, бесерман кырзанъёссэ но эктонъёссэс калыклы кузьмазы.