Суредаськисьёс понна комиксъёслы сӥзем «Ӝу» лаборатория ужаны
Таяз толэзе тодмо луиз, кин Президентлэн лулчеберт удысысь кичӧлтонъёсызъя фондлэсь грантъёссэ утӥз. Конкурсын шаерысьтымы 41 проект вормыны быгатӥз. Усто ӵектосъёс пӧлын Ижысь Флор Васильев нимо лыдӟетъюртлэн комиксъёслы сӥзем «Ӝу» лабораториез но.
«Ӝу» проект 2 бадӟым люкетлэсь пӧрмоз. Нырысь ик, библиотекаын комикс лэсьтон удыслы, удмурт суредасьёслы, удмурт комиксъёслы сӥзем лекциос ортчозы.
– Чакласькомы 8 таӵе пумиськон радъяны, отчы вань мылкыд карисьёс лыктыны быгатозы, ӧз ке быгатэ – ужрадэз онлайн но учкыны луоз, – вераз проектлэн авторез Алёна Глухова. – Оглом комикс дунне сярысь гинэ ум вераське, тыршомы Удмуртилэсь «культурной кодзэ» шӧдыны, валаны: вань-а со, кыӵе со?
Собере проектлэн огыр-бугыр вактэз кутскоз ни. Удмурт алфавитлы сӥзем комиксъёсты суредан понна 25 егитъёс люкамын луозы. Соос пичи огинъёслы люкиськыса, графической планшетъёс вылын котькуд буква сярысь удмурт комиксъёс малпалозы. Егитъёсын ужалоз шаерысьтымы суредаськись Леонид Бусыгин.
– Котькуд комикс ӟуч кылэ но берыктэмын луоз, вань мылкыд карисьёс сое валалозы, –вераз Алёна Глухова. – Бичетэн тодматскон ӝыт асьме библиотекаямы ортчытомы, кисьмам емышмес мукет лыдӟетъюртъёслы но кузьмаломы.