Соосын данъяське Удмуртия

Туэ шаермылэн сӥё-дано адямиосыз йылӥзы. Удмуртилэн дано кунмуртэз луизы Ижкарысь электромеханикая «Купол» заводлэн кивалтӥсез Фанил Зиятдинов но дуннелэн кусэн бызьылонъя кык полэс чемпионкаез Тамара Тихонова.

«Али мылкыды Олимпи шудонъёсын медаль басьтыкум кадь — пьедесталын сылӥсько, гимн шудэ. Туннэ басьтэм данъетэ Олимпи медаль кадь потэ. Со туж бадӟым награда мон понна. Туж шумпотӥсько монэ уг вунэто шуыса», — вера Тамара Тихонова.

Ужрадын сӥлы каризы элькунмылэн Данъян пул вылаз пыртэмъёсты но. Вылӥ азинсконъёс басьтыса ужамзы понна пусъемын предприятиосысь но организациосысь ӧнерчиос но кивалтӥсьёс.

Нимаз адямиос сяна, элькунмылэн Данъян пул вылаз шедизы коллективъёс: эмъяськонниос, нылпи садъёс, заводъёс но мукет. Культурая учреждениос пӧлын сыӵе дан сётэмын удмурт кун филармонилы.

«Милесьтым тыршеммес синйылтӥзы, — шуэ кун филармонилэн кивалтӥсез Алексей Фомин. — Азьланяз но турттом ужмес кулэезъя азьланьтыны но паськытатыны».

Кызьы пусйиз Удмуртилэн тӧроез Александр Бречалов, кун приёме люкаськизы соос, кин ас удысаз нырысетӥ радын мынэ, егитъёслы адӟем карымон луэ, нуналысь нуналэ ужаменыз шаермес но кунмес азинтэ. Тӧро люкськемъёслы тау кариз но выль вормонъёс доры огкылысь вамшытомы шуыса вераз.
http://www.myudm.ru/