Синпелетъёсты но историен герӟаськем интыосты утён калыккуспо нунал

Калыккуспо нунал юнматэмын культурая но история объектъёсты но интыосты утёнлы саклык висъян вылысь. Шаерамы 2 но жыны сюрс пӧртэм синпелетъёс лыдъясько. 350-эз соос кун ласянь нимысьтыз утьыса возисько. Пӧлазы вань быдэс дуннелы но тодмо луыны быгатӥсьёсыз.

Удмурт калык понна дуно но дано синпелетъёс, историен герӟаськем интыос ӧжыт ӧвӧл. Котькудиз сьӧрын история, калыкмылэн ортчем сюресэныз герӟаськем тодон-валан. Соос вашкалаеныз герӟет возё, вунэтыны уг сёто.

Нимаз инты басьто данэ потэм адямиослэн улэм коркаоссы — музей-юртъёс: Воткинскын — Петр Ильич Чайковскийлэн, Дэбес ёросын — Геннадий Корепанов-Камскийлэн, Алнаш ёросын — Ашальчи Окилэн, Геннадий Красильниковлэн, Шаркан ёросын — Григорий Верещагинлэн, Вавож ёросын утьыны тыршо дано улосчизылы Кузёбай Гердлы сӥзем юртэз.

http://www.myudm.ru/