Синкылиосын ӵош чузъяськизы кырӟан гуръёс

Туэ Ижын гинэ ветеранъёсты ӟечкыланы, парадэз учкыны 100 сюрслэсь ятыр адямиос вуылӥзы.

Нош “Вунонтэм полк” акциын Ижын 35 сюрс пала адямиос ӵыжы-выжыоссылэн туспуктэмъёсынызы ортчизы. Зыл-зыл бызись паськыт шур кадь мынӥзы акцие вуэмъёс.

Вормон нуналэз пусйизы  элькунмылэн  пӧртэм сэрегъёсаз. Палэнэ ӧз кыле Глаз ёросын улӥсьёс но. Куреггуртын “Вунонтэм полк” ужрадэ школаын дышетскисьёс, арлыдоос но гурт удысын ужасьёс потӥзы. Нырысь ик ортчытӥзы парад. Отын огазе маршировать каремзэс возьматӥзы пиналъёс, чузъяськизы фронтысь кырӟанъёс. Бӧрысь ини гуртоос ветеранъёслэн туспуктэмъёсынызы грут кузя ортчизы.

Шаркан ёросысь Быгиын улӥсьёс – пичиосыз но, мойыосыз но –  котьку сямен синпелетсы азьын люкаськылӥзы.  Быгиын но та муниципал кылдытэтэ пырись гуртъёсын войнаын ожмаськемъёс кылемын ӧвӧл ни. Нош тыл ож вакытэ ужамъёс, вордӥськемъёс – 41 мурт. Ваньзы сямен кышномуртъёс.

Нош Сапапул ёросысь Нечкино черкогуртын Вормон нуналэз выль памятник азьын пусйизы. Та нуналлы сое быдэсак выльдӥзы-тупатӥзы. Синпелет дорозь лэсьтэмын сюрес. Ӝуатиськиз табере Нечкино черкогуртын “ялан ӝуась тыл” но. Ожысь но ужысь ветеранъёс азьын школаын дышетскисьёс умой дышетскыны, геройёсты тодыса будыны  кыл сётӥзы.  Нечкиноысь одӥг семьяез но война палэнэ ӧз кельты. Отысь гинэ ог кык сю пала адями фронтысь ӧз берытскы. Соослэн нимъёссы табере весяклы гранит вылэ гожтэмын.

«Мӧзмыкумы шайвылэ мынӥськом, татчы но лыктӥськом вал, – шуэ Нечкино черкогуртын улӥсь Лилия Фархутдинова. – Табере выльдэм синпелет доры эшшо но шумпотыса лыктом ини. Сое 1981-тӥ арын гуртамы улӥсьес, пиналъёсын ӵош лэсьтӥзы вал. Табере мукет сямен тупатӥзы.  Туж шумпотӥськом. Нылпиосмы но татчы лыкто. Кыӵе усто соос выступать каризы!»

http://www.myudm.ru/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий