Сидоров кибашлыослэн адӟытонзы усьтӥськоз Удмуртиысь «Лудорвай» музейын-заповедникын
Сидоровъёслэн семьязы пужыё куиськон, пуэз вӧлон но суредаськон бордын тырше. Та киужъёс семьяын юнме ӧз кылдэ: вашкала ӵыжы-выжыоссы но творчествоен вырись адямиос вылӥллям.
Геннадий Сидоров — Удмуртиысь тодмо кибашлы. Со Россиысь суредасьёслэн огазеяськонзылэн ёзчиез, Удмуртиысь калык суредась, лулчеберет удысысь дано ужась, Удмуртилэн кун премиезлэн лауреатэз, кивалтэтлэн «Признание» премиезлэн лауреатэз но Ува ёрослэн дано адямиез луэ.
Адӟытонын нимысьтыз инты Тӧро пукон басьтоз. Ӵапак со котырын Тукля воршудлэн историеныз тодматозы. Мифологиен герӟаськем бадӟым но пичи синпелетъёс пыр учкисьёс суредасьлэн синмыныз калыксылэсь историзэ тодозы. Со сяна, адӟытонын Удмуртиысь лулчеберет удысысь дано ужасен, кивалтэтлэн «Признание» премиезлэн лауреатэныз Надежда Сидороваен но кибашлыослэн нылынызы Россиысь суредасьёслэн огазеяськонзылэн ёзчиеныз Екатерина Сунцоваен куэм коверъёс, ӵушконъёс, шарфъёс, йӧскалык шӧмо дӥсьёс возьматозы.
Адӟытон Волостной правленилэн юртаз 30-тӥ коньывуонысен 8-тӥ толсурозь ужалоз.