Дом Дружбы народов

    «Шундыкарлэсь» 30 арзэ пусйизы

    «шундыкарлэсь» 30 арзэ пусйизы 1

    Таяз аре «Шундыкар» ӧсъёссэ сӥзьыл, 9-тӥ куарусёнэ, усьтӥз, Иж котырысь «Ёлочка» лагерьын 10 нунал ӵоже мынӥз.

    – Жаляса верано, гужем милемыз пумитаны одӥг лагерь но дась ӧй вал, ваньзы асьсэлэсь сменоссэс ортчытъязы, – вераз «Шунды» огазеяськонлэн тӧроез Виолетта Анисимова, – нош милям сменамы бадӟым, вожатойёсты но ӧнерчиосты лыдъяса, сюлэсь трос люкаськиськомы. Занятиосты ортчытъян понна но милем трос инты кулэ. Соин ик сӥзьыллы лагерез выжтӥмы.

    Лагерьлэн нырысетӥ нуналаз ик пиналъёс выль дуннее зымизы.  «Шундыкарез» усьтыкузы, вожатойёс вань пиналъёсты ӧтизы малпам компьютерной шудонэ зымыны. «Шундыкаринг» кыстӥськиз 10 нунал ӵоже. Котькуд нунал пӧртэм отрядъёслы – министерствоослы – сӥземын вал. Шудӥсьёс пӧртэм удысъёсын асьсэ быгатонлыкъёссэс эскеризы, баллъёс – «аръёс» – люказы. Валтӥсь ужпумзы вал смена бырытозь 30 ар бичаны.

    Куд-ог анай-атайёс ӝожтӥськылӥзы, «Шундыкарен» сэрен пиналъёссы урокъёсты кельтозы, ӧжытгес тодон-валан люкалозы шуыса. Талы пумит ӧнерчиослэн валэктонзы ӝог кисьмаз: «Татын соос дышетскозы солы, малы школае ветлыкузы, ӧй дышысалзы!»

    Кылсярысь, «Программирование» отрядысь пиналъёс смартфонъёслы ватсэтъёс лэсьтӥзы, «Эстрада» отряд «Шундыкар» кырӟанъёсын концерт пуктӥз. «Журналистика» отрядысь пиналъёс нуналлы быдэ борддор газет лэсьтӥзы, котькуд ӵукна быдэс «Шундыкар» тыр чузъяськылӥз егит журналистъёслэн «Сайкан» радиозы. «Видеоискусство» отрядысь пиналъёс 10 нунал куспын клип поттӥзы, репортажъёс но опросъёс, удмурт брендъёслы рекламаос лэсьтӥзы. «Кылбурет» отряд «Сайкыт лӥял» кылбур бичет поттӥз. Нош «Театр» отряд Василий Шукшинлэн веросъёсызъя спектакль пуктӥз. «Кибашлыос» пулэсь но эпоксидной сирлэсь ӝок, чеберъяськон арбериос лэсьтӥзы.  «Фольклорысь» пиналъёс ӧнерчиенызы возьматӥзы, кызьы вашкала вакытъёсы егитъёс ваньмон дырзэс ортчытъязы, шулдыръяськизы. «Эктон» отрядысь пиналъёс пӧртэм ёросъёсын но улосъёсын улӥсь удмуртъёслэн эктонъёсынызы тодматскизы. Нош «Мунё» отрядысь пиналъёс тодӥзы, кыӵе мунёоосын соослэн песянайёссы шудылӥзы, асьсэос но соосты лэсьтӥзы.