«Шундыкаре» куриськон келян понна арня кылиз

Туэ уж 10 ӧръя нуиськоз. Мар кароно лагере шедён понна?

1. Гожтэтады одно ик пусъёно быръем ӧрдэс, нимтулдэс, вордӥськем ардэс, улон интыдэс (ӟуч но удмурт кылъёсын), кыӵе классэз быдтэмдэс, пӧртэм огазеяськонлэн ужъёсазы пыриськемдэс, «Шундыкар» лагере вуылэмдэс (арзэ но ӧрзэ), эн вунэтэ гожтыны телефон номердэс.

2. Быръем ӧрдыя ужъёстэс келяно:

• «Кылбурет» отряд (7-тӥ-11-тӥ классъёс) – сётэм темаосъя быдэн 1 кылбур гожтыса келяно: эрико тема, «Шундыкар» сярысь кырӟанлы кылбур, ӟуч кылысь удмурт кылэ берыктэм кылбур.
• «Фольклор» отряд (5-тӥ-9-тӥ классъёс) – ёросысьтыды яке гуртысьтыды 2 калык кырӟанэз быдэстэмдэс видеое гожтыса келяно. Сыӵе кырӟанъёс ӧвӧл ке, мукет удмурт калык кырӟанъёсты бырйыны яра. Кырӟанэз 2 куаралы люкыса дуэтэн быдэстэмдэс гожтыны яра. Видео 3 минутлэсь кема кыстӥськыны ӧвӧл кулэ. Со сяна кыӵе ке крезьгуро инструментэн шудэмдэс видеое гожтыса келяно. Видео 2 минутлэсь кема кыстӥськыны ӧвӧл кулэ. Вакчияк гожтоно асьтэ сярысь, гуртысьтыды пӧртэм интыос сярысь (кызьы но малы соос озьы нимасько), гуртысьтыды тужгес но тунсыко обряд сярысь яке пӧртмаськись интыос сярысь.
• «Эстрада» отряд (8-тӥ-11-тӥ классъёс) – 2 пӧртэм пумо эстрадной кырӟанъёсты фонограмма улсын быдэстэмдэс видеое гожтыса келяно. Огзэ яра акапелла быдэстыны. Огез кырӟан одно ик удмурт кылын луыны кулэ, кыкетӥез – мылкыддыя.
• «Эктон» отряд (6-тӥ-11-тӥ классъёс) – 2 калык эктонэз быдэстэмдэс видеое гожтыса келяно. Видео 3 минутлэсь кема кыстӥськыны ӧвӧл кулэ.
• «Мунё» отряд (5-тӥ-9-тӥ классъёс) – видеое гожтоно, кыӵе мунёосын шудо вал тӥляд гуртады, ёросады, кызьы сое лэсьтоно. Уката умой луоз, видеое мунё лэсьтӥсь пересьёсты пуктӥды ке.
• «Журналистика» (7-тӥ-11-тӥ классъёс) – гуртысьтыды тунсыко егит мурт сярысь материал гожтоно (жанрзэ асьтэос бырйыны быгатӥськоды: очерк, эссе, интервью, зарисовка), гуртты сярысь 5 ивор дасяно но соосты верамдэс видеое гожтыса келяно.
• «Театр» отряд (7-тӥ-11-тӥ классъёс) – удмурт кылын басня, кылбур яке монолог дышетоно, сое лыдӟемдэс видеое гожтыса келяно.
• «Кибашлы» отряд (7-тӥ-11-тӥ классъёс) – пуысь ас киыныды лэсьтэм 5 арберилэсь туспуктэмъёссэс келяно. Одӥгез сярысь видео дасяно: маин но кытын со лэсьтэмын, кыӵе станокъёс уже кутэмын. Гожтоно, марлы дышетскемды потэ смена ӵоже.
• «Программирование» отряд (8-тӥ-11-тӥ классъёс) – сётэм задачаослы валэктон шедьтоно: 1. Пересь воргорон корка пуктэм, солэн вань борддоръёсыз уйпал пала учко вылэм. Кытчы со корказэ пуктэм? 2. Ведрае 1 вирусэз понӥзы. Котькуд секунд одӥг вируслэсь кык вирус пӧрме. Тодмо, ведра 1 минут куспын быдэсак тырме шуыса. Кӧня секунд куспын ӝыны ведра вирусъёсын тырмоз? Со сяна программированилэсь котькыче кылзэ уже кутыса, малпано программа, кудӥзды 1 число сётӥськоз, нош со ас кожаз лыдъёялоз «1» но со число вискын сылӥсь числоослэсь суммазэс. Озьы ик удмурт кылэз дышетонъя приложение малпано.
• «Видеоискусство» отряд (8-тӥ-11-тӥ классъёс) – дэмлам ужъёс пӧлысь одӥгзэ быдэстоно: удмурт кырӟанлы 2-3 минутъем клип лэсьтоно; ужрадысь 2-4 минутъем репортаж дасяно; 5-7 минутъем фильм пӧрмытоно. Куриськонын пусъёно, кыӵе программаослэн юрттэменызы видео лэсьтэмын вал, кӧня ар ӵоже видеоискусствоен тунсыкъяськиськоды. Гожтоно, кыӵе тӥрлыкты съёмкаос понна вань, кыӵе компьютерной программаосын ужаны быгатӥськоды.

Йылпумъянъёс 29-тӥ гудырикошкон бере печатласькозы «Удмурт дунне», «Ӟечбур!» газетъёсын но интыяськозы «Шунды» огазеяськонлэн но «Шундыкар» лагерьлэн «ВКонтакте» бамъёсазы.