Шундыкар» но «Тулкым» лагеръёсты ортчытыны элькунысь коньдон висъялозы
Нылпиослэсь, быдэ вуымтэослэсь но егитъёслэсь шутэтсконзэс радъян, тазалыксэс юнматон но уже интыян удысын вариативной программаослэн конкурсазы 167 программа сётэмын вал. Кылдытэмын элькун программаослэн рейтингзы. Коньдонэн юрттэт 90 программа басьтӥз. Со сярысь ивортэ Удмуртиысь Физкультурая, спортъя но егитъёсын ужан политикая министерстволэн пресс-службаез.
Быдэ вуымтэосты уже огдырлы интыянъя конкурсэ элькунысь муниципал кылдытэтъёс 142 программа сётӥзы, со пӧлысь 123 ӵектос юрттэт басьтӥз. Озьы ик мер огазеяськонъёслэн быдэ вуымтэосты но егитъёсты ӧнерлы дышетонъя но огдырлы уже интыянъя укмыс программаоссылы коньдон висъяны ӵектэмын.
Пӧртэм аресъем нылпиослэсь коллективъёссэс (сводной отрядъёсты) радъянъя конкурсэ муниципалитетъёсысь 20 программа вуиз. Экспертъёслэн ӧризы 19 муниципал кылдытэтъёслы сводной отрядъёсты радъян понна спортъя арбериос но канцеляр вузъёс басьтыны субсидиос висъян сярысь пумкылъян кутӥз.
Тодэ вайытом, удмурт егитъёслэн «Шунды» огазеяськонэнызы радъям «Шундыкар» лагерьлэн сменаез 2017-тӥ арын гудырикошконэ 25-тӥ ползэ ни ортчиз. Отчы Удмуртиысь, Башкортостанысь, Татарстанысь, Пермь шаерысь, Марий Элысь 95 нылпиос пыриськизы. Соос 11 ӧръёсъя выль тодон-валанъёс люказы, быгатонлыкъёссэс волятӥзы.
Озьы ик «Шунды» кичӧлтэмъя кылдытэм «Тулкым» лагере секыт улон югдуре шедем удмурт пиналъёс пырисько. Кылем арын гудырикошконэ витетӥез смена радъяськиз. Элькунысьтымы 40 пиналъёс шутэтскем сяна, театр, фольклор но видеоискусство ӧръёсъя тодон-валан басьтӥзы.