«Шунды» огазеяськон нылпиослы чаклам ӵектоссэ быдэстыны 3 миллион манет пала грант утӥз

Ӵектос сярысь вераз «Шундылэн» кивалтӥсез Алина Чернова:

«Кӧня ке блоклэсь со: луозы нылпиослы удмурт кылэз дышетон понна ӝӧквыл шудонъёс но «Андроид» вылын ужась мобильной телефонэ ватсэтъёс».

Солэн кылъёсызъя, телефонэ ватсэтъёс пӧртэм арлыдъем нылпиослы тупамон луозы шуыса чаклало, соосты кылдытыны команда вань ни. Нош шудонъёсты малпаны адямиосты люкано луоз на. Нырысь ик кулэяськонъёсты эскерозы.

Ку дась луозы шудонъёс но ватсэтъёс, али вераны уг луы на. Вожвылъяськонлэн куронъёсызъя ӵектосэз 2018-тӥ арысь толсурозь улонэ пыӵатыны кулэ.

Ватсалом, грант басьтыны вожвылъяськонын Удмуртиысь 25 ӵектосъёс вормизы (оглом 44 миллион 677 сюрс манет тыр). Соос пӧлын «Удмурт Кенеш» огазеяськонлэн «Билингва» ӵектосэз но Глазкарысь «Шаертодонъя клуб» мер огазеяськонлэн «ДондыДорлэн воршудъёсыз» ӵектосэз.

Тодэ вайытом, удмурт кылын вераськись яке вераськыны дышетскись нылпиослы мобильной ватсэт азьвылгес но кылдытэмын ни вал. Кылем ар пумын сое «Билингва» удмурт центрлэн кичӧлтэмезъя лэсьтӥзы.

http://udmurt.media/udm/news/obshchestvo/27773/